Tàm dơ̆ lơh broă, càr Dăk Lăk neh đơs tus ală bơta kal ke tŭ lơh bàr rơndăp broă lơh gùng lòt tờm: gùng Hồ Chí Minh gơl gùng pleh Đah măt tơngai lik ƀòn dờng Buôn Ma Thuột mờ Gùng rơndeh ntoăt jờl Khánh Hoà – Buôn Ma Thuột.

Ồng Phạm Ngọc Nghị, Củ tịc UɃÑZ càr Dăk Lăk dờp jơnau ờ pràn tềng đăp Ƀộ Giao thông Vận tải tài ală rơndăp broă lơh gùng lòt tờm gơtìp lơyài. Củ tịc UɃÑZ càr Dăk Lăk sền gŏ geh bơta pleh kơnòl broă, ngòt gơtìp ờ geh kơnòl tàm ờ uă gah lơh broă geh gơnoar tàm càr dê. Jơnau đơs pơn dŭt dơ̆ lơh broă, Thứ trưởng Ƀộ Giao thông Vận tải ồng Lê Anh Tuấn sồr càr Dăk Lăk sền gròi rơlao tai tus mờ broă lơh ală rơndăp broă lơh gùng lòt tờm, tàm hơ̆ uă ngan là broă tơm ntrờn ù tiah nàng lơh pràn broă lơh. Tŭ do neh mờr mŭt tàm kàl mìu, geh ù tiah nàng gùng lơh sơlơ jal mhar ngan.