VOV4.K’ho- Ngai 10/6, tàm ƀòn dờng Đà Nẵng, Ƀộ Giáo zụk mờ Đào tạo bơyai lơh lam lơh srơh bơto re dà ờdo ờdă, sơndră bŭ dà mờ sơnđờm mut lơh khà pơrlòng re dà kơnòm bơsram phổ thông gùt lơgar nam 2022. Khà pơrlòng geh bơyai lơh bơh ngai 8 tus ngai 13/06 mờ bơta tus bal bơh 700 nă kơnòm bơsram tàm 26 càr, ƀòn dờng tàm gùt lơgar. Bulah rềs àr bŭ dà tàm lơgar he geh gơmù mơya pah nam kung gam geh pơgap 2 rơbô nă cau chơ̆t, jơnhoa ngan rlau jơh tàm tiah đah Jum mat tơngai lik câu Á dê mờ uă rlau 8 dơ̆ mờ ală lơgar bơtàu tơnguh.

Nam 2022, Ƀộ Giáo zụk mờ Đào tạo neh đơng lam lơh sir sră nggal bơto pơlam bơto bơtê rcang sơndră bŭ dà, ală sră nggal, video mblàng yal, bơto pơlam bơta chài rcang sơndră bŭ dà ai kơnòm bơsram in. Mờ kung bơyai lơh bơto broă lơh ờs mờng, broă lơh bè rcang sơndră bŭ dà, bơtê re dà, dong kờl cau bŭ dà ờdo ờdă ai 400 nă kwang bàng, cau pơgru tờm bơh 63 Sở Giáo zụk mờ Đào tạo in.

Cau mblàng K’Hạnh