VOV4.K’ho- Drim ngai 1/07, Mpồl lòt sền sồ 4, Ƀộ Giáo zụk mờ Đào tạo neh lòt sền broă lơh rcang dơ̆ pơrlòng jơh bơsram kấp pe nam 2022 tàm càr Dăk Nông. Pơrlòng jơh bơsram kấp pe nam 2022, gùt càr Dăk Nông geh 6 rơbô 881 nă kơnòm pơrlòng cih mat dan pơrlòng, tàm hơ̆ geh 6 rơbô 593 nă kơnòm pơrlòng kấp pe mờ 288 nă kơnòm pơrlòng Giáo zụk thường xuyên. Càr ai 19 tiah pơrlòng mờ 303 cơldŭ pơrlòng, gơguh tai 1 tiah pơrlòng pơndrờm mờ dơ̆ pơrlòng nam lài. Tus tŭ do, jơh ală tiah pơrlòng tàm ù tiah càr Dăk Nông neh rcang gùng dà broă lơh bơyai lơh pơrlòng jat jơnau sồr bơh Ƀộ Giáo zụk mờ Đào tạo dê.

Bộ Giáo zụk mờ Đào tạo lòt sền broă lơh rcang dơ̆ pơrlòng jơh bơsram kấp pe nam 2022 tàm càr Dăk Nông

Tơnơ̆ tŭ lòt sền geh ngan tàm bàr pe tiah pơrlòng, Mpồl lòt sền bơh Ƀộ Giáo zụk mờ Đào tạo tơngkah bàr pe bơta digơlan gơlik geh bè: kơnòm pơrlòng “nisơna” cèng điện thoại mut tàm cơldŭ pơrlòng; kơnòm pơrlòng, cau gròi sền bơtờp kòp Kovid-19... den tàng bè hơ̆, lài mờ tŭ kơnòm pơrlòng mut tàm cơldŭ pơrlòng, càr pal sồr kờp sền nền ală broă rcang lài, rcang lài bơsong jơnau gơlik geh, gàr niam sền gàr bơta lơngap lơngai, ờdo ờsă dơ̆ pơrlòng.

Cau mblàng K’Hạnh