VOV4.K’ho- Ngai 30/06, Mpồl lòt sền bơh Ƀộ Giáo zụk mờ Đào tạo dê bơh Thứ trưởng Ƀộ Giáo zụk mờ Đào tạo ồng Nguyễn Văn Phúc lơh kwang ătbồ mpồl neh geh dơ̆ lơh broă mờ Mpồl đơng lam pơrlòng jơh bơsram kâp pe nam 2022 càr Dăk Lăk bè broă lơh bơyai lơh dơ̆ pơrlòng.

Anih bơyai lơh dơ̆ lơh broă

Bơh lòt sền, mpồl kwang bàng neh đơs niam ngan broă lơh rơcăng ai dơ̆ pơrlòng tàm càr Dăk Lăk in, bơh rơcăng tơl phan bơna tus broă bơto pơlam ai kwang bàng tus bal drơng broă dơ̆ pơrlòng in, broă in sao jơnau ai pơrlòng, jun pơndiang jơnau ai pơrlòng tus anih pơrlòng mờ sền gàr jơnau ai pơrlòng ndrờm jăt di jơnau sồr lơm. Mpồl kwang bàng sồr Sở Giáo zụk mờ Đào tạo càr Dăk Lăk pơgồp bal niam mờ ală anih lơh broă geh gơrềng bal rơcăng niam bè ală bơta. Tàm hơ̆, pal sền gròi rlau tai tus broă lơh bơto pơlam kơrnoăt pơrlòng tài bơh nam do geh uă bơta pa. Dơ̆ pơrlòng do, Dăk Lăk geh rlau 20 rbô 400 nă cau pơrlòng lơh sră cih mat tus bal pơrlòng. Càr rơndăp 32 anih pơrlòng ngan ngồn bal mờ 869 cơldŭ pơrlòng tàm ù tiah 15 kơnhoàl, thị xã mờ ƀòn dờng.

Cau mblàng Lơ Mu K’Yến