Bơh 3 nhai lam lơh dơ̆ lơh uă lòt sền, bơsong ală broă lơh tìs rơndăp tăp sèng lơngăp lơngai lòt rê tàm gùng, Mpồl Kảñ sát gùng lòt neh gŏ mờ lơh glài rlau 788 rbô nă cau lơh tìs rơndăp tăp sèng lơngăp lơngai lòt rê tàm gùng; rlau 112 rbô nă cau lơh tìs bè broă ntoăt răt tàm gùng rơndeh...

Ƀộ Kwang àng tơn jơh dơ̆ lơh uă lòt sền, bơsong broă lơh tìs rơndăp tăp sèng, lơngăp lơngai lòt rê tàm gùng

Bal mờ hơ̆, mpồl Kwang àng neh bơyai lơh mblàng yal rlau 31 rbô nă cau ătbồ hìu ñô sa dờng, hìu ƀar, anih tam ya...; hòi jà rlau 25 rbô mpồl lơh sa kă bro, 190 rbô nă cau lơh jăt niam broă tă dăp, pơndiang phan di bơta kơn jơ̆ rơndăp lơh bơh rơndeh dê; sùm tơngkah năc lòt ñô sa tàm ală hìu ñô sa dờng lơh jăt niam jơnau sồr bơh Adat Rơcăng sơndră bơta aniai bơh ơlak bièr dê; ờ gŏ di măy is rơndeh tŭ neh ñô ơlak bièr...

Bơh hơ̆, pơgồp bơnah gàr niam broă rơndăp tăp sèng lơngăp lơngai lòt rê tàm gùng, gơhoài jăt bal gơmù rềs àr gùng lòt tàm làm gùt lơgar, rềs àr gùng lòt gơmù jơh bal 3 broă jàu pơndrờm mờ tơngai lài mờ tŭ lam lơh jăt dơ̆ lơh uă.