Tàm dơ̆ wă rò, Thứ trưởng Ƀộ Kwang àng ồng Lương Tam Quang đơs nền, lơgar Việt Nam sùm sền lơgar Mỹ là lơgar tam klăc lơh broă bal geh bơta pràn uă ngan bè măy mok, jak chài- măy mok mờ kơ̆p kờñ rề ơnàng, sơlơ lơh broă bal tai tàm gah broă ngan ngồn, geh cồng nha mờ lơgar Mỹ tàm ală gah broă uă jơnau tơl pràn.

Tàm tơngai tus, nàng sơlơ tơnguh tai gĭt gơ̆p lơh sa, tăc blơi phan bơna, bơcri priă ndrờm pal mờ bơta pràn bơtàu tơnguh bơh gĭt gơ̆p 2 lơgar dê, USABC sồr Cíñ phủ Việt Nam đơs bal mờ Ƀộ Kwang àng đơs is rơ̆p pơn jăt tai sền gròi, ai tơl bơta ƀươn ai ală mpồl lơh sa kă bro lơgar Mỹ in bơcri priă kơ̆ kơl jăp, jŏ jòng tàm lơgar Việt Nam. Ală mpồl lơh sa kă bro tàm mpồl bơh USABC dê hơ rơ̆p dong kờl lơgar Việt Nam lơh jăt ală jơnau kờñ bơtàu tơnguh, kwơmàng là jơnau kờñ tam gơl sồ, bơ̆t bơtàu rài lơh sa sồ, mpồl bơtiàn sồ, sơlơ tơnguh tai lơngăp lơngai internet, rơcăng lài kơryan ồs sa bơrtoh.