Jăt Anih duh broă Làng bol càr Dăk Nông yal, broă jòi, lơh gơlik phan mờ ngui lŭ bauxite tàm càr geh lam lơh neh 17 nam mơya tus tŭ do rơ̆p mìng ơm wơl tàm phan bơna alumin lơm, ờ hềt geh trà mờ phan bơna tơnơ̆ trà. Broă bơcri priă lơh ală broă bơ̆t bơtàu, rơndăp broă lơh kung bè dan gùng dà lòt sền, bơcri priă ală rơndăp broă lơh tàm ù tiah càr dê ndrờm gơkòl tài bơh gơrềng tus rơndăp ù tiah phan kwơ tàm ù bauxite. Thủ tướng Cíñ phủ sồr ală ƀộ, gah broă dà lơgar geh gơrềng tă pơgồp jơnau đơs tă bơsong mơya tus tŭ do ală bơta gơkòl, ờ hềt dipal ờ hềt bơsong dipal. Jăt ồng Hồ Văn Mười, Củ tịc Anih duh broă Làng bol càr Dăk Nông dê đơs, bauxite kờñ pal geh sền swì là dồ bơta phan kwơ tàm ù krơi is mờ geh broă lơh bơsong dipal. Dăk Nông kờñ ngan bơta jơh nùs pơgồp bal bơh ală ƀộ, mpồl, gah broă dê nàng gơtùi tam gơl Adăt Phan kwơ tàm ù tàm dơ̆ pơrjum Quôk hội mờr tus.

Đơs tàm dơ̆ lơh broă, ồng Trương Thanh Hoài, Thứ trưởng Ƀộ Lơh sa mờ măy mŏk mờ Kă bro phan pà gĭt, mờ ală kal ke, bơta gơkòl càr dan, Ƀộ Lơh sa mờ măy mŏk mờ Kă bro phan cih dờp mờ rơ̆p pơgồp bal mờ ală ƀộ, mpồl, gah broă tă pơgồp jơnau đơs mờ Cíñ phủ, mờ Quôk hội, gờñ tă bơsong nàng càr gơtùi lam lơh ală kơnòl broă lơh sa- mpồl bơtiàn.