Mpồl lơh broă dong kờl bơh ling klàng làng bol Việt Nam dê lòt tus lơgar Thổ Nhĩ Kỳ tus bal broă lơh dong kờl rềs àr, bơsong jơnau gơ lời wơl tơnơ̆ tơrluh ù geh 76 nă ling. Bơh ngai 13 tus ngai 22/02, mpồl ling klàng làng bol Việt Nam geh 76 nă sỹ quan, ling lơh broă mờng chài neh tus bal lòt dong kờl kòn bơnus mờ dong kờl rềs àr tơrluh ù tàm lơgar Thổ Nhĩ Kỳ, tàm bơta trồ tiah ờ niam, mpồl neh lòt jòi tàm 31 anih, git gŏ 15 anih geh cau tàm ală gơnru hìu tơrlah tơrlơm, tàm hơ̆ geh 2 anih geh tềl tơnggŏ geh bơta kis, neh jàu ai mpồl dong kờl rềs àr lơgar Thổ Nhĩ Kỳ in 28 ƀồc cau chơt lik hờ bơdìh. Mpồl neh jàu pà mờr 25 tấn phan bơna, măi mok, phan sa dong kờl làng bol tàm tiah gơlik geh tơrluh ù.

Tàm dơ̆ bơyai lơh, Ƀộ Quôk phòng dan pà Ƀằng khen bơh Thủ tướng Cíñ phủ dê ai 4 mpồl cau mờ 7 nă cau dùl nă să. Tàm dơ̆ jờng rơ, jơh 76 nă cau bơh mpồl dê neh geh pà ƀằng khen bơh Ƀộ trưởng Ƀộ Quôk phòng dê tài neh geh cồng nha jak ngan tàm broă lam lơh kơnòl.