Nàng lam lơh geh cồng nha kơnòl broă nam bơsram pa 2023- 2024, Ƀộ trưởng ồng Nguyễn Kim Sơn sồr càr Dăk Nông tơrgùm sồr lơh mờ lơh jăt niam bàr pe broă, bè: sền gròi, bơcri priă rlau tai ai bơto bơtê tiah sar lơgar ngài, tiah jơi bơtiàn dùl êt nă cau in, jơh nùs lam lơh broă lơh rwah cau pơgru bơto sa priă nhai dà lơgar nàng gàr geh khà jăt bơta ai; lơh jăt ngac ngar, ai mờ rơndăp cau pơgru pal geh tơl bè khà, ndrờm bal bè rơndăp tăp sèng; sơlơ tơnguh tai phan bơna, phan ngui măy mok hìu bơsram; lơh pràn mpồl bơtiàn lơh bal tàm bơto bơtê; ngui geh cồng nha mpồl cau lơh broă gơ jăt bal mờ lơh pràn tam gơl pa bơceh lơh, ngui mờ bơtàu tơnguh pràn kơldang jak chài, măy mok; tơrgùm lơh jăt geh cồng nha broă lam lơh broă lơh bơto bơtê pê kâp jăt tŭ tơngai. Ồng Nguyễn Kim Sơn, Ƀộ trưởng Ƀộ Giáo zụk mờ Đào tạo, đơs: Nam bơsram pa tus là dùl nam bơsram di broă, di anih tàm ală tŭ tam gơl pa jơnau bơto pê kâp. Broă dờng rlau uă ngan pơndrờm mờ ală nam lài, den tàng neh tơrgùm den tơrgùm rlau, neh lơh ngan jơh nùs den lơh ngan jơh nùs rlau. Nàng wèt tus cồng nha lồi dŭt tàm nam 2025 lơh sir wil tơl tŭ tơngai tàm pơdar tam gơl jăt broă bơto bơtê pa mờ rơcăng ală bơta nàng lam lơh jăt broă bơto bơtê pa gơ wèt mờ kâp mầm non.

Di dơ̆ lòt sền broă lơh rơcăng nam bơsram pa in, Ƀộ trưởng Ƀộ Giáo zụk mờ Đào tạo ồng Nguyễn Kim Sơn neh lòt còp, pơndờm pơnđiang mờ pà 2 nơm ti vi, 100 nơm rơndeh coh ai pơgru mờ kơnòm bơsram Hìu bơsram Kâp bàr Hoàng Văn Thụ mờ Hìu bơsram Kâp dùl Nơ Trang Lơng tàm xã tiah sar lơgar ngài Quảng Sơn, kơnhoàl rƀah Dăk Glong in.