VOV4.K’ho- Mho ngai 15/07, tàm ƀòn dờng Dà Làc, Ƀộ trưởng Ƀộ Kế hoạc mờ Đầu tư ồng Nguyễn Chí Dũng bal mờ mpồl lơh broă neh geh dơ̆ lơh broă mờ càr Lâm Đồng. Dơ̆ lơh broă tơrgùm sền swì cồng nha 20 nam lơh jăt Kơrnoăt sồ 10 mờ 10 nam lơh jăt Jơnau đơs pơndŭt sồ 12 bơh Ƀộ Cíñ trị dê tàm càr.

Bơh hơ̆ pà gŏ, lơh sa càr Lâm Đồng dê geh bơta bơtàu tơnguh pràn jơh bal bè khà broă mờ bơta niam. Khà gơguh lơh sa kờp bal geh 10,4%; tơrgùm priă dia dà lơgar bơh 504 tơmàn đong tàm nam 2002 gơguh tus rlau 11 rbô tơmàn đong tàm nam 2021; kờp jơh priă bơcri jơh gùt mpồl bơtiàn bơh nam 2021 dê geh 27 rbô 365 tơmàn đong, uă rlau tus 19 dơ̆ pơndrờm mờ nam 2002. Bal mờ hơ̆, bơta pràn tàm pơrlòng bơh rài lơh sa dê gơguh pràn, phan bơna lơh sa- mpồl bơtiàn sùm geh sền gròi bơcri priă lơh sir gơs mờ tam gơl pa; lơh jăt niam broă lơh tơn jơh jơgloh tơrmù rƀah; ờdo ờdă rài kis mpồl bơtiàn geh lơh niam; lơngăp lơngai cíñ trị mờ rơndăp tăp sèng ờdo ờdă jơh gùt mpồl bơtiàn geh gàr kơ̆.

 Cau mblàng Lơ Mu K’Yến