VOV4.K’ho- Mho mang ngai 1/07, ồng Nguyễn Chí Dũng, Ủy viên Ƀan Cấp hàñ Đảng dà lơgar, Ƀộ trưởng Ƀộ Kế hoạch mờ Đầu tư mờ ồng Nguyễn Hồng Diên, Ủy viên Ƀan Cấp hàñ Đảng dà lơgar, Ƀộ trưởng Ƀộ Kông thương, bal mờ mpồl lơh broă dà lơgar neh geh dơ̆ lòt còp mờ lơh broă tàm càr Dăk Nông bè broă lơh jat Nghị quyết mờ jơnau đơs pơn dŭt bơh Ƀộ Cíñ trị dê bè bơtàu tơnguh lơh sa- mpồl bơtiàn, gàr niam sền gàr dà lơgar, sền gàr bơta lơngap lơngai tiah Tây Nguyên.

Ƀộ trưởng Ƀộ Kế hoạch mờ Đầu tư mờ Ƀộ trưởng Ƀộ Kông thương lơh broă tàm Dăk Nông

Pơn dŭt dơ̆ lơh broă, Ƀộ trưởng Ƀộ Kế hoạch mờ Đầu tư ồng Nguyễn Chí Dũng đơs, Dăk Nông sền bal là neh lơh geh uă cồng nha kwơ màng pơndrờm mờ jơnau kờñ geh ai tơlik bơh Nghị quyết dê; ală anih lơh broă cíñ trị, bơta sền gàr bơta lơngap lơngai, rơndap tap sèng geh kơ̆ kơljap mờ sền gàr kơ̆ kơljap; rài kis nùs nhơm, phan bơna làng bol dê, ngan là tiah làng bol kòn cau dùl ết nă cau ngai sơlơ geh tơnguh. Ƀộ trưởng ồng Nguyễn Chí Dũng đơs ngan, Dăk Nông pal lơh mhar tơngai rơndap ù tiah càr, jat nền tàm tơngume gùng dà bơtàu tơnguh bơh Dà lơgar, ală ƀộ, ngàñ dê neh yal nàng gàr niam bơta kơ̆ kơljap mờ bơtàu tơnguh di gùng dà gờñ ai Dăk Nông bơtàu tơnguh mhar mờ kơ̆ kơljap.

Cau mblàng K’Hạnh