Mho òr (04/06), Quốk hội pơn jăt tai dơ̆ Lùp mờ hơ jơnau lùp gơwèt gah kông thương. Ală kwang bàng Quốk hội sồr Ƀộ trưởng Ƀộ Kông thương ồng Nguyễn Hồng Diên lơh loh ală broă lơh nàng tơmù, kơrian broă lơh tìs nàng wèt tus bơ̆t bơtàu kă bro điện tử, ală gùng dà broă lơh niam mờ bơsong bơta kal ke ai mpồl lơh sa kă bro in brồ guh mờ bơtàu tơnguh lơh sa.

Ƀộ trưởng ồng Nguyễn Hồng Diên pà git: ală nam do, broă kă bro điện tử tàm lơgar Việt Nam pơn jăt tai gơguh pràn mờ khà gơguh geh bơh 20 tus 25% pah nam, lơgar Việt Nam geh rơndăp tàm mpồl 05 lơgar geh khà gơguh lơh sa pơnrơ ngan tàm dunia; priă geh bơh kă bro điện tử geh rơlao 20 tơmàn dolar Mỹ. Ƀộ trưởng pà git neh sền gròi ndrờm bal uă broă lơh tơnguh uă cồng nha atbồ jăt sền, sền gàr gơnoar kwơ cau ngui sa kung bè lơh gơs gùng dà broă lơh, tơnguh broă lòt sền, sền gròi, lơh geh gùng dà dờp mờ yal wơl cau ngui sa in, sơrbì broă tăc phan ờ di mờ adăt boh lam tàm anih lơh broă sồ. Bè atbồ broă tăc phan tàm internet, Ƀộ Kông thương rơ̆p đơng lam pơgồp bal mờ ală anih lơh broă gơrềng bal nàng sền, gròi sền mờ bơsong; ngui mpồl atbồ drà kă bro nàng gŏ, tam dră lơh loh ală broă lơh tìs.