VOV4.K’ho- Di dơ̆ lòt Pơrjum Kwang bàng kâp dờng kwơmàng Asean mờ Mỹ tàm càr lơgar Washington, lơgar Mỹ dê, Ƀộ trưởng Ƀộ Kông thương Việt Nam ồng Nguyễn Hồng Diên neh lơh broă 2 gah mờ Kwang đơng lam bồ Ƀộ Lơngăp lơngai dơlam is dà lơgar Mỹ mờ Anih lơh broă Sền swì broă tăc blơi phan, lòt rê mờ lơgar ndai mờ Sền gàr tiah nhàr lơgar lơgar Mỹ dê, Kwang đơng lam bồ Tập đoàn tăc rah rài Walmart.

Ƀộ trưởng Ƀộ Kông thương ồng Nguyễn Hồng Diên pà gĭt, Cíñ phủ kung bè Ƀộ Kông thương Việt Nam kơ̆p kờñ tơnguh bơta gĭt gơ̆p lơh sa, kă bro mờ đah lơgar Mỹ, ngan là gơwèt mờ gah tàñ mai phan, tài bơh do là gah lơh broă geh gơrềng uă ngan tus broă ờdo ờdă rài kis mpồl bơtiàn, ngui gĭt nđờ tơlak nă cau lơh broă tàm lơgar Việt Nam. Gơrềng tus ală jơnau pal jăt bè anih lơh gơlik phan kă bro, Ƀộ trưởng sồr ală anih lơh broă geh gơnoar bơh lơgar Mỹ dê lơh geh mpồl lơh jăt adat boh lam dùl bă song dơ pă, ring bal, gàr niam bơta kwơ bơh cau lơh broă lơgar Việt Nam dê mờ bơta kwơ dipal bơh gah tăc phan mờ lơgar ndai lơgar Việt Nam dê.

Cau mblàng Lơ Mu K’Yến