Tàm dơ̆ wă, Ƀộ trưởng ồng Lương Tam Quang jờng rơ gơnoar broă, bơta tă pơgồp bơh să tờm Kwang ătbồ Anih lơh broă ala măt lơgar Australia dê tàm broă sơlơ tơnguh bơta git gơp 2 gah đah Australia mờ Việt Nam, kuơmàng là broă tơnguh bơta git gơp 2 lơgar gơ gơs Lơgar lơh broă bal tơl làm di dơ̆ lòt còp lơgar Australia bơh Thủ tướng ồng Phạm Minh Chính dê tàm nhai 3 pa do. Nàng pơn jat tai tơnguh bơta git gơp lơh broă bal đah Ƀộ Kwang àng mờ ală anih lơh broă lơh jat adat boh lam lơgar Australia, Ƀộ trưởng ồng Lương Tam Quang sồr 2 gah pơn jat tai gàr sùm lam lơh, lơh jat lơh broă bal jat ală sră nggal lơh broă bal neh kĭ, pơn jat tai kơlôi sơnơng cribơyai Jơnau ring bal lơh broă bal tàm gah lơngăp lơngai internet mờ rơcang lài kơryan cau tìs ngui măi mok pa. Pơn jat tai cribơyai jơnau tơnggit bè ală bơta cau tìs geh mpồl bal gan ală lơgar, atbồ bơta lik mờ mut tàm lơgar ndai, cribơyai jơnau tơnggit bè rơcang lài kơryan lik mờ mut tàm lơgar ndai mờ ntrờn tiah ơm kis tìs adat boh lam pơhìn lơngăp lơngai dà lơgar bơh tơl lơgar dê.