Tàm dơ̆ wă, Bộ trưởng đơs loh, lơgar Việt Nam mờ Nhờk neh lơh broă bal jrô ơnàng làm uă tàm uă gah broă. Bộ trưởng ồng Tô Lâm pin dờn, tàm tơngai tus, bơta gĭt gơ̆p 2 lơgar rơ̆p pơn jat tai bơtàu tơnguh niam bơnĕ.

Bộ trưởng ồng Tô Lâm kơ̆p kờñ ồng Takebe Tsutomu tam pà bal bè gùng dà broă lơh 2 gah dê digơlan pơgồp lơh bal nàng pơgồp bơnah tơrmù ƀà uă ngan rlau jơh rềs àr gùng lòt mờ chơ̆t tài bơh rềs àr gùng lòt tàm lơgar Việt Nam dê, kung bè hòi jà, sồr ngan ală anih lơh broă geh gơrềng bơh lơgar Nhờk dê geh ală broă lơh dong kờl, tơnguh uă bơta pràn jak ai mpồl Kảñ sát gùng lòt lơgar Việt Nam in. Bộ trưởng ồng Tô Lâm kung sồr ồng Takebe Tsutomu sền gròi sồr ală mpồl lơh broă ai lài sền sơ wì, sac rơwah cau ling lòt lơh kơnòl broă Kwang àng làng bol, kung bè dong tàm tơrbŏ bal, lơh broă bal đah ală mpồl lơh broă Bộ Kwang àng mờ Hìu bơsram Đại họk Việt Nam mờ Nhờk.