Ƀộ trưởng ồng Tô Lâm jờng rơ uă ngan 2 Mpồl kwang bàng ala mat Mpồl lơngap lơngai Lào mờ Việt Nam neh lơh ngan pơgồp bal rcang mờ bơyai lơh geh cồng nha Pơrjum Lơh broă bal lơngap lơngai Việt Nam mờ Lào dơ̆ 13 mờ uă tơngume neh geh đơs tàm dơ̆ cribơyai, cribơyai mờ lơh geh bơta ring bal uă. Ngan là, 2 gah neh kĭ sră nggal Pơrjum lơh broă bal lơngap lơngai Việt Nam mờ Lào dơ̆ 13 mờ uă gah broă lơh broă bal pa.

Ƀộ trưởng ồng Tô Lâm đơs sùm, Ƀộ Kwang àng Việt Nam kơ̆p kờñ bal mờ Ƀộ Kwang àng Lào gàr kơ̆ lơngap lơngai is, rcang is, ờ lời ală nùs nhơm sò tơm bơh lơgar ndai sơmờm lơgar do lơh aniai tus lơngap lơngai, kơ̆ kơljap bơh lơgar ne dê mờ lơh tam cah is bơta gĭt gơ̆p 2 lơgar dê; đơs nền Ƀộ Kwang àng Việt Nam rcang lài dong kờl Lào gàr niam lơngap lơngai, rơndap tap sèng Nam Củ tịc Asean 2024.