VOV4.K’ho - Tàm dơ̆ tus lơh broă tàm ƀòn dờng Osaka, lơgar Nhờk, Ƀộ trưởng Ƀộ Lao động-Thương biñ mờ xã hội ồng Đào Ngọc Dung neh tus còp mờ lơh broă mờ Mpồl drơng gàr lơh sơnơm Osaka, geh ală dơ̆ tìp mờ ală kwang bàng bal mờ Mpồl lơh sa kă bro dờp cau bơsram lơh broă tàm do.

Ƀộ Lao động-Thương biñ mờ xã hội ồng Đào Ngọc Dung bal mờ mpồl kwang bàng lơh broă mờ mpồl sền gàr gah lơh sơnơm Osaka

Nam 2019, Ƀộ Lao động-Thương biñ mờ xã hội neh jào Anih tờm lơh broă bơdìh lơgar kĭ jơnau ring bal lơh broă bal mờ Mpồl sền gàr lơh sơnơm Osaka lơgar Nhờk. Do là broă lơh ờ geh kwơ, priă tă ờ uă, broă rơwah cau lơh broă ndrờm bal, cau lơh broă geh bơto broă lơh, bơta dà đơs lơgar bơdìh nền nòn, geh bơta niam uă. Tơnơ̆ mờ 2 nam gơtìp gơrềng tài bơh kòp Kovid-19, tus bồ nam 2022, 14 nă cau bơsram broă lơh lơgar Việt Nam sơnrờp ngan neh geh lơh sră tus lơh broă tàm Osaka. Nàng rơcang ai ală dơ̆ dờp cau bơsram broă lơh tàm tơngai tus, Mpồl lơh sơnơm ƀòn dờng Osaka neh lơh gơs broă lơh hìu ơm bal mờ măt sơnđan “Hà Nội”. Bơdìh hơ̆ tai, Mpồl do gam ai uă ƀlàng nhơl pa nàng cau bơsram broă lơh mhar lơh kwèng mờ bơta chài rơgơi lơgar Nhờk.

Cau mblàng Ndong Brawl