VOV4.K’ho- Mang ngai 07/03, tàm hìu duh broă Ƀộ Ngoại giao, Ƀộ trưởng Ƀộ Ngoại giao ồng Bùi Thanh Sơn neh geh dơ̆ hòi điện thoại cribơyai mờ Ƀộ trưởng Ƀộ Ngoại giao lơgar Rumani ồng Bogdan Aurescu.

Tàm dơ̆ cribơyai tàm điện thoại, Ƀộ trưởng Ƀộ Ngoại giao Việt Nam ồng Bùi Thanh Sơn đơs nền, Việt Nam sền dờng màng mờ kơ̆p kờñ pơn jăt tai lơh jrô ơnàng rlau tai bơta gĭt gơ̆p lơh bơyô bal ờs mờng bơh yau bal mờ tŭ tơngai kah yau rlau 70 nam đah Việt Nam mờ Rumani. Bàr Ƀộ trưởng neh cribơyai uă broă lơh ngan ngồn nàng kờñ sơlơ rề ơnàng mờ lơh jrô ơnàng rlau tai bơta gĭt gơ̆p lơh bơyô bal ờs mờng đah 2 lơgar, tàm hơ̆ geh broă pơgồp bal lơh ală dơ̆ lòt còp kwang bàng kâp dờng mờ tìp măt ală kâp, gàr sùm broă lơh tàm lùp cíñ trị, Ủy ƀan tàm bơrlŭ bal bè lơh broă bal lơh sa, kă bro mờ bơcri priă đah Việt Nam mờ Rumani, sơlơ lơh broă bal tàm ală gah broă ờs mờng bơh yau, bè bơto bơtê, niam chài, nhơl chờ kung bè lơh pràn ală gah broă lơh bềng bơta pràn pa bè lơh broă, lơh broă sa sươn sre.

Cau mblàng Lơ Mu K’Yến