Ală nhai bồ nam 2023, kờp jơh priă dia tàm Gia Lai neh geh 2 rơbô tơmàn đong. Kờp jơh khà tăc rah rài phan bơna mờ priă lơh geh drơng broă 4 nhai kờp dŭ lơh geh rlau 30 rơbô tơmàn đong, gơguh rlau 25% pơndrờm dùl tŭ bal mờ nam lài. Priă lơh geh tăc phan mờ lơgar ndai 4 nhai kờp dŭ lơh geh 310 tơlak dolar Mỹ, tàm hơ̆ tăc phan mờ lơgar ndai tờm ngan là kơphê, kao su gơguh jơh bal mờ khà tơnhào bal mờ priă jền. Nam do, càr Gia Lai geh jàu sền sơ wì broă rơndap lơh ai priă bơcri dà lơgar rlau 4 rơbô tơmàn đong, kờp tus tŭ do mìng pa ai geh 335 tơmàn đong.

Đơs tàm dơ̆ lơh broă, Ƀộ trưởng Ƀộ Ngoại giao ồng Bùi Thanh Sơn cih dờp ală cồng nha càr Gia Lai neh lơh geh tàm ală gah broă mờ sồr càr pơn jat tai lơh jat niam bơta pràn, sơlơ tơnguh lơh broă bal dunia nàng rề ơnàng drà kă bro tăc phan mờ lơgar ndai. Bè priă bơcri ai tàm ală rơndap broă lơh, Ƀộ trưởng Ƀộ Ngoại giao ồng Bùi Thanh Sơn đơs là khà ai priă bơcri dà lơgar mờ càr Gia Lai lơh geh là lơyài ngan, den càr pal geh broă lơh ai broă do in.