Tàm dơ̆ wă rò, Ƀộ trưởng Ƀộ Ngoại giao lơgar Việt Nam ồng Bùi Thanh Sơn đơs niam ngan Đại sứ ồng Iain Frew neh jơh nùs lam lơh uă broă lơh 2 gah tàm tơngai lài, pơnrơ ngan là broă 2 gah geh Jơnau yal bơr bal pa bè Tam klăc lơh broă bal Jŏ jòng tàm nhai 09 nam 2020 lài do. Broă bàr gah kĭ mờ ai lơh jăt Hiệp địñ Kă bro Khăt gơboh đah Việt Nam mờ Anh neh pơgồp bơnah ai lơgar Anh gơ gơs là lơgar tam klăc lơh broă bal kă bro dờng dơ̆ 3 tàm drà câu Âu, drà tăc phan mờ lơgar ndai dờng dơ̆ 9 bơh Việt Nam dê mờ là cau bơcri priă kwơmàng bơh câu Âu dê tàm Việt Nam, bulah gơrềng bơh kòp dờng Kovid-19. Di tàm dơ̆ do, ồng Bùi Thanh Sơn sồr Đại sứ lơgar Anh ồng Iain Frew pơn jăt tai sồr lơh ală broă lơh lơh broă bal geh cồng nha tàm ală gah broă ờs mờng bơh yau bè kă bro- bơcri priă, bơto bơtê, lơngăp lơngai- sền gàr dà lơgar; mơkung pờ ơnàng lơh broă bal tàm ală broă pa mờ lơgar Anh geh bơta pràn mờ dipal mờ bơta ai lài bơtàu tơnguh bơh Việt Nam dê bè gơguh tơlir, gơdờp mờ tam gơl trồ tiah.