VOV4.K’ho - Tàm hìu lơh broă Ƀộ Ngoại giao, Ƀộ trưởng Ƀộ Ngoại giao ồng Bùi Thanh Sơn neh wă Thứ trưởng dơ̆ dùl Ƀộ Ngoại giao lơgar Mỹ mò Wendy Sherman di tàm dơ̆ tus còp lơgar Việt Nam bơh ngai 10 tus 13 nhai 06 nam 2022.

Tàm dơ̆ wă, Ƀộ trưởng đơs tờm, lơgar Việt Nam sền lơgar Mỹ là dùl tàm ală lơgar lơh broă bal kwơ màng lài ngan; tŭ lơi kung rơcang bal mờ lơgar Mỹ chồl pràn broă lơh bal tơl ală bơta mờ jrô ơnàng, geh cồng nha, mùl màl tàm tơngu me git jơnau bal mờ bơta khăt gơboh is, geh gơnoar tờm ù tiah dà lơgar mờ thể cế cíñ trị bal. Bàr gah cri bơyai bè ală broă lơh mùl màl chồl pràn broă lơh bal tàm ală gah đah bàr lơgar bè tam gơl mpồl kwang bàng đờng màng, rơcang sơndră mờ kòp gơtờp, brồ guh wơl lơh sa mpồl bơtiàn tơnơ̆ mờ kòp gơtờp, cri bơyai broă kă bro, bơcri priă, tơmù hoàc huơr bơh rài tam lơh, broă ù tiah nàng lơh hìu lơh broă anih ala măt. Bàr gah kung cri bơyai bè ală broă tàm dunia mờ tàm tiah do geh sền gròi bal bè ală broă bơceh lơh tơrbŏ bal tàm tiah câu Á – Thái Bình Dương mờ Ấn Độ Dương, broă tàm dà lềng đah măt tơngai lik, tơnguh bơtàu kơl jăp mờ tơnguh broă bơto bơtê bal tàm tiah dà dờng Mekong, bơta lơgar Nga mờ lơgar Ukraine.

Cau mblàng Ndong Brawl