VOV4.K’ho - Tàm hìu lơh broă Ƀộ Ngoại giao, Ƀộ trưởng Ngoại giao ồng Bùi Thanh Sơn neh wă Thứ trưởng Ngoại giao lơgar Ấn Độ ồng Saurabh Kumar di tàm dơ̆ tus còp lơgar Việt Nam mờ đơng lam bal dơ̆ pơrjum tàm lùp cíñ trị dơ̆ 12 mờ cri bơyai broă lơh jŏ jòng dơ̆ 9 đah Ƀộ Ngoại giao bàr lơgar bơh ngai 29 tus ngai 31 nhai 05 nam 2022.

Tàm dơ̆ wă, Ƀộ trưởng ồng Bùi Thanh Sơn sồr bàr gah pơn jăt tai chồl pràn ală broă lơh tờm tàm broă lơh bal kwơ màng bè: Cíñ trị-lơh broă bal mờ lơgar ndai, sền gàr bơta lơngăp lơngai dà lơgar-bơcri priă, khoa họk – kông nghệ, bơta chài rơgơi mờ tìp bal làng bol, tàm hơ̆ uă ngan là chồl pràn broă lơh bal nhơl chờ tàm bơta bàr lơgar neh pờ mpồng nhàr dà lơgar mờ gam bơyai lơh ală broă lơh geh kwơ màng nàng tơnkah 50 nam Ngai crơng gơs broă lơh git gơp bal bơh nam 1972 tus 2022. Thứ trưởng Ngoại giao lơgar Ấn Độ đơs, lơgar Ấn Độ sùm sền lơgar Việt Nam là lơgar tờm kwơ màng tàm broă lơh “Wèt tus hờ tiah đah măt tơngai lik”, mờ hơ geh pơgồp bal chồl pràn rơlao tai broă lơh bal jŏ jòng tơl ală bơta đah bàr lơgar tàm tơngai tus.

Cau mblàng Ndong Brawl