VOV4.K’ho- Mho ngai 15/09, Mpồl lơh broă bơh Ƀộ Thông tin mờ Truyền thông bơh ồng Nguyễn Mạnh Hùng, Ƀộ trưởng lơh Kwang ătbồ mpồl neh lòt còp mờ lơh broă mờ càr Bạc Liêu bè broă lơh Tam gơl sồ mờ ală broă lơh lam lơh jăt Rơndăp broă lơh bơtàu tơnguh tiah drà ngac ngar. Đơs tàm dơ̆ lơh broă, Ƀộ trưởng ồng Nguyễn Mạnh Hùng pà gĭt, bơh tơrgùm kờp bơh càr Bạc Liêu dê, geh pơgăp 30 rbô hìu bơnhă rƀah, hìu bơnhă mờr bè hìu bơnhă rƀah ờ geh điện thoại ngac ngar, Ƀộ geh dong kờl 15 rbô nơm ai càr in bơh Broă lơh “Gùng internet măy tíñ ai oh in”.

Mờ 15 rbô nơm gam wơl, Ƀộ trưởng jàu ai 3 mpồl viễn thông dờng in là VinaPhone, MobiFone, Viettel dong kờl ai càr in. Mờ ală jơnau dan ndai bơh càr Bạc Liêu dê, Ƀộ trưởng ɃộThông tin mờ Truyền thông ồng Nguyễn Mạnh Hùng jàu ală mpồl lơh broă ờs mờng bơh Ƀộ dê dong kờl mờ tă bơsong. Ƀộ trưởng kung sồr càr Bạc Liêu sền sră cah Sở Văn hoá, Thông tin, Thể thao mờ Zu lịc, lơh tai dùl Sở là Sở Thông tin mờ Truyền thông.

 Cau mblàng Lơ Mu K’Yến