Tàm ală nhai bồ nam, broă lơh sa, mpồl bơtiàn bơh càr Cao Bằng dê pơn jăt tai geh bơta gơguh. Ală gah broă niam chài, lơh sơnơm, bơto bơtê mờ bơsram, ai broă lơh, rài kis lơh broă sa mpồl bơtiàn mờ ală gah broă mpồl bơtiàn ndai pơn jăt tai geh sền gròi, bơtàu tơnguh; cíñ trị mpồl bơtiàn kơ̆ kơl jăp; sền gàr dà lơgar, lơngăp lơngai mpồl bơtiàn geh gàr niam, bơta git gơ̆p mờ lơgar ndai càr dê pơn jăt tai geh pờ ơnàng.

Củ ñiệm Ủy ƀan Jơi bơtiàn ồng Hầu A Lềnh sồr càr Cao Bằng lơh jăt tơl ală nghị quyết bơh Cíñ phủ. Tàm hơ̆, tơrgùm bơsong bơta kal ke ai mpồl lơh sa kă bro in, ngui bơta pràn geh is, bơta geh bal mờ bơta pràn bơtàu tơnguh lơh sa mpồl bơtiàn càr dê. Bal mờ hơ̆, càr pal gàr niam broă lơh rài kis lơh broă sa mpồl bơtiàn, tàm hơ̆ uă ngan là ală xã tàm tiah làng bol jơi bơtiàn ờ gal cau geh dờp ală broă dong kờl, nàng tơmù rơhòi bơta ờ ndrờm tàm rài bal bơh đah làng bol dê.