VOV4.K’ho- Mho ngai 27/4, Mpồl kwang bàng bơh Ủy ƀan Zân tộk dê bơh Ƀộ trưởng, Củ ñiệm Ủy ƀan Zân tộk ồng Hầu A Lềnh lơh kwang atbồ mpồl neh geh dơ̆ lơh broă mờ Ủy ƀan Ñân zân càr Gia Lai bè broă lơh kòn cau mờ bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm. Mờ broă lơh Jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2025, càr Gia Lai dan dà lơgar dong kờl mờr 6 rbô tơmàn đông nàng càr lam lơh ală broă lơh bè gàr ờdo ờdă rài kis, mpồl bơtiàn, broă lơh tơrmù rƀah.

Tàm dơ̆ lơh broă, ồng Hầu A Lềnh đơs là, Gia Lai neh geh uă bơta sền gròi tus broă lơh kòn cau. Càr neh geh ală broă lơh dong kờl krơi is bơtàu tơnguh lơh sa mpồl bơtiàn tiah làng bol jơi bơtiàn kòn cau dùl êt nă cau. Ồng Hầu A Lềnh sồr Gia Lai wèt tus broă bơcri priă geh tơngume tờm rlau ai tiah jơi bơtiàn kòn cau dùl êt nă cau in, tơrgùm tàm ală tiah rƀah.

Cau mblàng K’Duẩn