VOV4.K’ho- Ngai 26/4, Mpồl kwang bàng bơh Ủy ƀan Zân tộk dê bơh Ƀộ trưởng, Củ ñiệm Ủy ƀan Zân tộk ồng Hầu A Lềnh lơh Kwang atbồ mpồl neh lòt còp, lơh broă tàm xã Ia Mơr, kơnhoàl Chư Prông, càr Gia Lai bè broă lam lơh jat broă lơh kòn cau tàm tơngai pa do. Ia Mơr là xã tiah nhàr dà lơgar bơh kơnhoàl Chư Prông dê. Gùt xã geh 5 thôn, ƀòn bal mờ 10 jơi bơtiàn kòn cau ơm kis bal, tàm hơ̆ cau Jrai geh rlau 70%. Xã gam atbồ, sền gàr rlau 14 rbô lồ brê mờ ù tam sền gàr brê. Xã gam chồl pràn broă hòi jà làng bol tus bal dờp ơpah tam mờ sền gàr brê, bơtàu tơnguh lơh sa suơn sre- brê bơnơm nàng tơnguh tai priă jền lơh geh.

Ƀộ trưởng, Củ ñiệm Ủy ƀan Zân tộk ồng Hầu A Lềnh

Jat Ƀộ trưởng, Củ ñiệm Ủy ƀan Zân tộk ồng Hầu A Lềnh đơs, broă lơh kòn cau tàm xã Ia Mơr tàm tơngai lài neh lơh geh 2, 3 cồng nha pal pơn jờng ngan. Mơya tài ù lơh sa bơh làng bol dê gam rah rài, gùng lòt gam uă bơta ờ niam, den tàng rài kis làng bol gam kal ke. Ồng Hầu A Lềnh neh geh jơnau sồr mờ xã in 2, 3 broă lơh nàng kờñ tơnguh ală bơta pràn, bơta ƀuơn, pơgồp bơnah tơnguh mhar broă lơh tơrmù rƀah, ngan là hìu bơnhă rƀah jơi bơtiàn kòn cau dùl êt nă cau; sồr xã sền gròi tus broă sền gàr, tơnguh bơta niam chài bơh jŏ krơi is bơh tơl jơi bơtiàn kòn cau dê gơ jat bal mờ bơt bơtàu, gàr kơ̆ tam klac bal.

Cau mblàng K’Duẩn