VOV4.K’ho - Ƀộ trưởng Ngoại giao ồng Bùi Thanh Sơn sơn đờm dơ̆ tus còp mùl màl lơgar Hàn Quốc di dơ̆ tus Pơrjum Ƀộ trưởng broă lơh Đông Nam Á bơh Tổng thư ký Mpồl lơh broă bal mờ tơnguh bơtàu lơh sa jăt jơnau jà bơh Tổng thư ký Mpồl lơh broă bal mờ tơnguh bơtàu lơh sa, bơh ngai 09 tus ngai 11 nhai 02 nam 2022.

Tàm gơnoar broă cau lam bồ Ƀộ Ngoại giao lơgar Việt Nam, do kung là dơ̆ tus còp lơgar Hàn Quốc sơnrờp ngan bơh Ƀộ trưởng ồng Bùi Thanh Sơn dê tơnơ̆ mờ tŭ geh tơnpồ. Broă lơh git gơ̆p lơh broă bal jŏ jòng đah lơgar Việt Nam mờ lơgar Hàn Quốc pơn jăt tai geh lơh sùm, geh cồng nha tàm uă gah broă; tìp bal dờng màng, ală kấp, ƀộ, gah lơh broă, ală càr, ƀòn dờng geh lơh ndrờm bal, uă bơta bè còp tơn, cri bơyai tơn, cri bơyai tàm điện thoại, tìp bal tềng gah pơrjum uă lơgar. Lơgar Việt Nam kung là lơgar tờm tàm broă lơh wèt hờ tiah đah jum pa geh tơnguh bơh lơgar Hàn Quốc dê. Bàr lơgar pơn jăt tai geh sùm broă kờñ bal, pơgồp bal nền nòn tàm ală pơrjum tàm tiah do mờ tàm dunia.

Cau mblàng Ndong Brawl