VOV4.K’ho- Dờp jơnau jà bơh Ƀộ trưởng Ngoại giao ồng Bùi Thanh Sơn dê, Ƀộ trưởng Ngoại giao lơgar Panama mò Érika Mouynes neh lòt còp ngan ngồn lơgar Việt Nam bơh ngai 05 tus ngai 06/4/2022. Tàm Hìu nac Cíñ phủ, Ƀộ trưởng Bùi Thanh Sơn neh tìp mat cribơyai broă mờ mò Érika Mouynes. 2 gah neh yal mờ gơp bè broă bơh tơl lơgar dê rềp ndo; kờp sền broă gơlik geh mờ cribơyai ală broă lơh sơlơ tơnguh lơh broă bal tàm ală gah cíñ trị, lơh broă, lơh sa, kă bro, lơh sa suơn sre... kung bè lơh broă bal tàm ală dơ̆ cribơyai dunia, uă lơgar. 2 Ƀộ trưởng kung ai tơnggŏ bơta kơp kờñ tơnguh lơh broă bal đah 2 lơgar tàm ală gah pa gam geh uă bơta pràn bè pơndiang phan gùng dà lềng, sơndră mờ tam gơl trồ tiah, năng lượng gơlik wơl,...; mờ kung tam pà, ring bal nùs nhơm bơsong ală tam pìt tam phà dunia mờ broă lơh ring lơngai jat bơnàng jă adat boh lam dunia.

Cau mblàng K’Duẩn