VOV4.K’ho- Dờp jơnau jà bơh Ƀộ trưởng Quôk phòng Việt Nam, Đại tướng Phan Văn Giang, Ƀộ trưởng Quôk phòng Ấn Độ ồng Rai-nát Xinh (Rajnath Singh) geh dơ̆ lòt còp ngan ngồn lơgar Việt Nam 3 ngai, bơh ngai hìng, 08/6.

Tàm dơ̆ lòt còp, Ƀộ trưởng Quôk phòng Ấn Độ ồng Rai-nát Xinh kờp dŭ geh mut còp Gơlăng ƀồc Củ tịc Hồ Chí Minh, tìp mat cribơyai broă mờ Ƀộ trưởng ồng Phan Văn Giang, tus lùp còp Củ tịc lơgar ồng Nguyễn Xuân Phúc mờ Thủ tướng Phạm Minh Chính. 2 Ƀộ trưởng geh sền sơ wì bè lơh broă bal sền gàr dà lơgar đah 2 lơgar tàm tơngai lài mờ cribơyai ală jơnau bơceh pa nàng kờñ sơlơ tơnguh bơta tàm tơrbŏ bal tàm gah do. Tàm dơ̆ lòt còp dơ̆ do, Ƀộ trưởng Quôk phòng Ấn Độ ồng Rai-nát Xinh geh sền dơ̆ jàu 12 nơm rơkì lòt sền ntoat rat gơ ơm tàm bơnah priă càn sền gàr dà lơgar kờp priă 100 tơlak dolar Mỹ bơh Cíñ phủ Ấn Độ dê lời ai Việt Nam in. 

Cau mblàng K’Duẩn