VOV4.K’ho- Ƀộ Y tế pa geh jơnau đơs tă pơgồp ai gùng dà bơyai lơh pơrlòng jơh bơsram kâp pe nam 2022, tàm hơ̆ đơs tus jơnau dilah ală kơnòm bơsram gơtìp gơrềng tài bơh kòp Kovid-19. Tàm hơ̆, gơwèt mờ kơnòm bơsram là F0, dilah gam geh jăt sền, sơm kòp tàm hìu sơnơm tàm tơngai geh lơh dơ̆ pơrlòng, geh dong kờl dờp gơkờn jơh bơsram kâp pe. Tàm tŭ dilah kơnòm bơsram geh bơta kơ̆p kờñ lòt pơrlòng jơh bơsram kâp pe geh bơyai lơh pơrlòng tàm dơ̆ pơrlòng ndai. Kơnòm pơrlòng là F0 gam geh sơm kòp, ơm yah ngài tàm hìu tàm tơngai geh lơh dơ̆ pơrlòng kung geh sền swì dong kờl dờp gơkờn jơh bơsram kâp pe.

Tàm tŭ dilah kơnòm bơsram geh bơta kơ̆p kờñ lòt pơrlòng, pal geh sră dan pơrlòng bơh kơnòm bơsram dê mờ kĭ pà gĭt ai gơnoar bơh mè bèp kơnòm pơrlòng dê halà cau ala măt dê, tàm hơ̆ geh tơngume kơnòm pơrlòng hơ lơh jăt niam ală broă lơh rơcăng sơndră kòp Kovid-19. Mùl màl, bơyai lơh cơldŭ pơrlòng jơh bơsram kâp pe is ai kơnòm pơrlòng F0 in jăt sền, ơm yah ngài tàm hìu in dilah geh bơta kơ̆p kờñ. Kơnòm bơsram là cau ơm rềp mờ cau kòp (F1) geh lòt pơrlòng bal mờ ală kơnòm bơsram ờ gơtìp gơrềng tài bơh kòp Kovid-19. Kơnòm bơsram là cau kòp jăt sền (cau kòp gơtìp pin) geh lòt pơrlòng. Mpồl duh broă pơrlòng bơyai lơh ai kơnòm bơsram gơwèt cau kòp pin gơtìp kòp tàm ală cơldŭ pơrlòng is lơh geh jơnau sồr bè rơcăng sơndră kòp Kovid-19.

Cau mblàng Lơ Mu K’Yến