VOV4.K’ho - Tàm kơnhoàl Nam Trà My, càr Quảng Nam, geh dùl bă brê gơnrơh geh làng bol kis tàm tiah kơh bơnơm sơnđan là “Bă brê ồng Năm Công”. Bă brê do neh geh tŭ là pôs liên khu ủy 5, tềng đăp mờ broă đơng lam bơh Ƀí thư Liên khu ủy 5 ồng Võ Chí Công neh lơh gơs kơnòl kwơ màng tàm tơngai tam lơh mờ ling lơgar Mỹ sò tơm (1959-1964), lơh jăt cồng nha lài ngan bè Gùng dà broă lơh jŏ jòng bơh kăc màng đah jum dê tàm ală nam 1960. Kah tus broă lơh dờng màng bơh ƀồc ồng Võ Chí Công, làng bol kòn cau kis tàm do neh tam jà bal sền gàr bă brê do, sền gàr cơng tàng rài lài do tàm ală nam nhai tam lơh cui rơcai.

    Bă brê gơnrơh geh làng bol kis tàm tiah kơh bơnơm sơnđan măt "Bă brê ồng Năm Công" ơnàng 30 lồ

Tus kơnhoàl tiah kơh bơnơm Nam Trà My, càr Quảng Nam, uă cau gơlơh ngoh rơngăc ngan tŭ tàm tiah tàm gùl kơnhoàl geh dùl bă brê gam bè ờs ơnàng 30 lồ, geh prăp gàr gam bè ờs tơn. Bơh mpồng mŭt tàm tiah tềl kah yau rài lài do Dà lơgar Liên Khu ủy 5 mờ Mpồl đơng lam ling klàng Khu 5 lòt jơng rơlao 30 phút gùng bơnơm tus tềng anih duh khoai Củ tịc Hội đồng Nhà nước ƀồc ồng Võ Chí Công, gŏ tềng đăp măt geh uă ngan tòm chi dờng rơlao 100 nam, dờng bơh 4 tus 5 nă cau koar ờ tus. Bă brê do neh geh tŭ pồn kơl dìng kwang bàng, cau ling Liên khu ủy 5 tàm tơngai cui rơcai ngan bơh dơ̆ tam lơh mờ ling lơgar Mỹ sò tơm. Lŏ Hồ Thị Hạ, kis tàm ƀòn 2 xã Trà Mai, kơnhoàl Nam Trà My, càr Quảng Nam pà git, bơh gam dềt, pah tŭ guh mŭt tàm “Bă brê ồng Nam Công”, lŏ geh mè bèp nting bơto nền nòn ngan là bañ sreh aniai ală tờm chi dờng ha là dềt lơi. Ờ hềt kờñ tus mờ kơrnoăt tàm adăt boh lam bè sền gàr brê, ală rơnàng làng bol kis tàm kơnhoàl Nam Trà My bè hơ̆ sùm tàm bơto bal sền gàr bă brê gơnrơh do. “Brê do là brê wa Năm Công dê, ală cau ờ sreh den tàng he kung ờ sreh, ờ geh cau lơi mŭt tàm brê do khin cèng bal pềs, yoas lơi. Bol añ mìng lòt pĭc biăp, ờ gŏ khin mus kơl aniai chi brê, kung ờ khin sreh, kơl tờm chi tơn”.

Củ tịc Hội đồng Ñà nước ồng Võ Chí Công tàm dùl dơ̆ tus còp làng bol kis tàm kơnhoàl Nam Trà My, càr Quảng Nam

Nam 1959, tiah bơnơm Nước Là gơwèt xã Trà Mai, kơnhoàl Nam Trà My geh Liên Khu ủy 5 mờ Mpồl đơng lam ling klàng Liên Khu 5 rơwah lơh pôs ling sơnrờp ngan mờ măt sơnđan Mật khu Đỗ Xá. Tơngai do, ồng Võ Chí Công, Ƀí thư Liên Khu ủy 5 tus ơm kis tàm do nàng đơng lam kăc màng. Ƀí thư Liên Khu ủy 5 neh đơng lam kwang bàng, cau ling mờ lam sồr làng bol lơh tơrlah jơh phan kơrian bơh ling sò tơm, pờ ơnàng pôs ling tàm tiah kơh bơnơm, chồl pràn broă mù tus tàm tiah ring, tơnguh khà cau tàm mpồl, pờ ơnàng ù tiah tam lơh. Tềng đăp mờ broă đơng lam bơh ƀồc ồng Võ Chí Công, ling klàng bal mờ làng bol kis tàm Liên khu ủy 5 neh lơh geh cồng nha Nghị quyết sồ 15 nam 1959 bơh Mpồl đơng lam Đảng dà lơgar khoă II dê, pơgồp bal tàm broă pờ ơnàng gùng ai dơ̆ tam lơh tơnklàs đah jum dà lơgar, dà lơgar tơrgùm bal.

                                                         Brê geh sền gàr gam bè ờs
Ồng Hồ Văn Ni, Củ tịc UɃÑZ kơnhoàl Nam Trà My lài do, là cau neh geh tŭ tus bal tam lơh tềng đăp mờ broă đơng lam bơh Ƀí thư Liên Khu ủy 5 ƀồc ồng Võ Chí Công kah wơl, ală nam nhai tam lơh tàm pôs ling Nước Là, ƀồc ồng Võ Chí Công tŭ hơ̆ geh măt sơnđan là Võ Toàn, sùm ơm mờ dờp bal bơta glar bòl mờ làng bol, geh làng bol ală kòn cau gơboh mờ dong kờl bal. Ồng Hồ Văn Ni yal wơl: “Ồng Võ Chí Công sùm tus tàm ală tiah nàng lam sồr mờ tus bal tơn tàm broă lơh sa mờ làng bol, nàng geh tơl phan sa drơng tàm broă tam lơh in. “Brê do là anih wa Năm Công neh geh tŭ ơm kis tàm do nàng lam sồr làng bol tus bal mờ kăc màng, den tàng pah dơ̆ tus mờ tiah tềl kah yau Liên Khu ủy 5 den cau lơi kung kah tus mờ wa Năm Công lơm, kah tus bă brê wa Công dê. Bơh tŭ tam cah kơnhoàl Trà My, bol añ là cau đơng lam tơn, lam sồr làng bol bañ mus kơl chi brê, bañ lơh mìr. Geh sền gàr brê mờ lời bè ờs tơn tiah tềl kah yau do nàng kòn sao rơnàng tơnơ̆ do in kah wơl bè rài lài do”.

Tơnơ̆ mờ nam 1964, tiah tơnklàs geh pờ ơnàng, Khu ủy Khu 5 ntrờn mù tus tàm tiah Nước Oa, xã Trà Tân, kơnhoàl Bắc Trà My, càr Quảng Nam mơya bă brê ồng Năm Công kung gam geh làng bol kis tàm kơnhoàl Nam Trà My sền gàr. Nam 2003, kơnhoàl Nam Trà My dan mờ Ƀộ Văn hoá – Thể thao mờ Zu lịc dờp Tiah tềl kah yau rài lài do Khu ủy mờ Mpồl đơng lam ling klàng Khu 5 gơs tiah tềl kah yau rài lài do dà lơgar dê. Jăt ồng Nguyễn Văn Cẩn, Kwang atbồ Ƀan Tuyên giáo Huyện ủy Nam Trà My yal, bơh bă brê ồng Năm Công, làng bol kis tàm kơnhoàl Nam Trà My sơlơ wă rơlao tai tus mờ bơta kwơ màng bơh broă sền gàr brê. Tus tŭ do, kờp jơh bă brê hòn is tàm kơnhoàl Nam Trà My rơlao 43 rơbô lồ, geh rơlao 62% khà brê tàm kơnhoàl do dê. “Làng bol gŏ là, gàr geh bă brêwa Năm Công gam bè ờs bè hơ̆ là neh sền gàr geh tiah kis brê jơh gùt kơnhoàl Nam Trà My dê. Tŭ do, bol añ rề ơnàng tus jơh ală xã ndai nàng pơn jăt tai sền gàr tiah kis brê bơnơm dê, den tàng kơnhoàl Nam Trà My geh tơnguh bơtàu tờm kơnuh sơnơm Ngọc Linh”.

Tŭ gam kis, Củ tịc Hội đồng Nhà nước ƀồc ồng Võ Chí Công sùm kah tus mờ ờ sŭk bè rài kis bơh làng bol ală kòn cau tàm tiah tam lơh lài do dê. Tam lơh neh tơn jơh mờ neh jŏ mờr nggùl rài do, ală bă brê hòn is gam bè ờs neh geh tŭ kơl dìng cau ling, pồn kwang bàng lơh broă kăc màng, tŭ do kung gam geh sền gàr niam, rài kis làng bol tàm tiah kơh bơnơm neh gơguh uă ngan kơnờm bơh broă tam ală bơta phan lơh sơnơm tàm tiah mƀur chi brê. Ồng Nguyễn Thanh Hồng, Kwang atbồ sở Văn hoá – Thể thao mờ Zu lịc càr Quảng Nam pà git, càr do geh ai broă atbồ, prăp gàr bă brê ồng Nam Công lơh tơrlòng lài nàng lơh geh uă tus tàm ală tiah kơh bơnơm ndai tàm càr Quảng Nam dê.

Cau mblàng Ndong Brawl