Bè broă bơt bơtàu Adat boh lam, jat jơnau kờp dŭ lài broă lơh, Ủy ƀan Thường vụ Quôk hội sền sơwì, tă pơgồp jơnau đơs bè ală rơndap broă lơh: Adat Ală mpồl ai càn priă (tam gơl); Adat Ù tiah (tam gơl); Adat tam gơl, bơtơl bàr pe bơta bơh Adat lik mờ mut tàm lơgar he bơh làng bol lơgar Việt Nam dê mờ Adat lik mờ mut tàm lơgar he dê, lòt gan nhàr lơgar, ơm kis ing bơh làng bol lơgar ndai tàm lơgar Việt Nam dê.

Ủy ƀan Thường vụ Quôk hội kung tă pơgồp jơnau đơs bè jơnau rcang cih Nghị quyết tam gơl, bơtơl Nghị quyết sồ 85 bè broă ai sră pin dờn, đùh sră pin dờn gơwèt mờ cau at gơnoar broă bơh Quôk hội, Hội đồng Ñân zân pồ halà ring bal. Gơrềng ală broă lơh sa- mpồl bơtiàn, Ủy ƀan Thường vụ Quôk hội tă pơgồp jơnau đơs bè jơnau đơs bơtơl cồng nha lơh jat kơnòl broă bơtàu tơnguh lơh sa, mpồl bơtiàn mờ kes priă Dà lơgar nam 2022; bơta lam lơh jat broă rơndap lơh bơtàu tơnguh lơh sa- mpồl bơtiàn mờ kes priă dà lơgar ală nhai bồ nam 2023 mờ bàr pe tơngume kwơ màng ndai.