VOV4.K’ho- Drim ngai 14/08, Ƀảo tàng Dăk Lăk pơgồp bal mờ Mpồl sền gàr bơkào tòng brê Việt Nam, Viện Kông nghệ Siñ họk mờ Môi trường - Hìu bơsram Đại họk Tây Nguyên, mờ bàr pe mpồl lơh broă bơyai lơh Broă lơh “Ai bơkào tòng rê wơl mờ brê bơnơm geh is”, lơh broă lơh bơkiar rlau 3 rơbô tờm bơkào tòng tàm ală tờm chi tàm ƀlàng Bảo tàng Dăk Lăk mờ Tiah tềl lời wơl kah yau dà lơgar sồ 4 Nguyễn Du (sùm hòi là Biệt Điện Bảo Đại).

Bơkiar rlau 3 rơbô tờm bơkào tòng tàm ală tờm chi

Ồng Phan Xuân Thủy, Củ tịc Mpồl cau kờñ bơkào tòng brê Việt Nam pà gĭt, bơh tŭ do tus lồi nam, broă lơh “Ai bơkào tòng rê wơl mờ brê bơnơm geh is” geh gam bơyai lơh pơgap 3 dơ̆ tai, lơh jat broă tam bơkào tòng tàm jơh ală tờm chi tàm Bảo tàng Dăk Lăk, ƀòn dờng Buôn Ma Thuột dê, mờ ai bơkào tòng rê wơl tàm brê dà lơgar Yok Đôn, mờ kơ̆p kờñ pơgồp bơnah sền gàr, prap gàr ală sơltìl bơkào tòng ờ hoan geh ngan tàm brê bơnơm kung bè dong cau năc geh sền gŏ tai ală bơta niam ngan bơh ù tiah Dăk Lăk dê.

Cau mblàng K’Hạnh