VOV4.K’ho- Mìng tàm pơgăp dùl poh rềp ndo, ƀòn dờng Buôn Ma Thuột, càr Dăk Lăk neh gŏ 2 rbô 482 nă cau kòp Kovid-19, tàm hơ̆ geh 2 rbô 245 nă cau bơtờp tàm mpồl bơtiàn. Tềng đăp bơta gơbàn kal ke bơh kòp bơtờp dê, mho ngai 22/02, ƀòn dờng Buôn Ma Thuột neh geh jơnau yal sồ 524 bè broă ngui bàr pe broă lơh rơcăng sơndră kòp Kovid-19 tàm ù tiah ƀòn dờng kờp bơh 6 jiơ drim ngai 23/02/2022 tus dì tŭ geh jơnau yal pa.

Ală kơnòm bơsram kâp dùl, ơdŭ 6, 7, 8, 10, 11 geh wơl bơsram wơl bơh tàm internet nàng rơcăng sơndră kòp

Jăt mờ hơ̆, ƀòn dờng Buôn Ma Thuột sồr ơm ing jơh broă lơh kă bro ală drơng broă geh pơhìn lơh bơtờp uă (anih tam ya, karaoke, massa, hìu ƀar, internet, jơnau nhơl điện tử), ală anih lơh hàng să jan, tàm hơ̆ geh lơh nđias, bong bơka muh mat, spa...Ơm ing jơh ală broă lơh bơto bơtê tơn tàm hìu bơsram gơwèt mờ kâp mầm non mờ lam lơh jăt broă lơh bơto bơtê bơh tàm internet gơwèt mờ kâp dùl, ơdŭ 6, 7, 8 mờ ơdŭ 10, 11. Mìng is ơdŭ 9 mờ ơdŭ 12 mờ ală hìu bơsram ndai tàm ù tiah ƀòn dờng Buôn Ma Thuột bơyai lơh bơto bơtê tơn tàm hìu bơsram mơya geh bơta: gàr niam ờdo ờdă tàm broă lơh rơcăng sơndră kòp Kovid-19; cau pơgru, cau bơsram dờng, kơnòm bơsram tus bal bơto mờ bơsram pal geh cĭt tơl 02 ding vaccine halà bời kòp Kovid-19 ờ uă rlau ir 6 nhai.

Kờp tus tŭ do, ƀòn dờng Buôn Ma Thuột neh gŏ rlau 7 rbô 540 nă cau kòp Kovid-19, tàm hơ̆ geh 2 rbô 620 nă cau neh sơm bời kòp. Buôn Ma Thuột kung là tiah mìng dùl lơm bơh càr Dăk Lăk dê là tiah kam- hơ̆ là kâp pe là tiah pơhìn uă.

Cau mblàng Lơ Mu K’Yến