Bơh 10 nam là lơgar lơh broă bal jŏ jòng, bơta git gơ̆p lơh bơyô bal mờ lơh broă bal đah lơgar Việt Nam mờ lơgar Thái Lan neh geh ală broă lơh gơguh kơl jăp tàm ală gah broă cíñ trị, lơh sa, cri bơyai broă mờ lơgar ndai, bơta niam chài, sền gàr dà lơgar-bơta lơngăp lơngai. Gơwèt mờ ƀòn dờng Đà Nẵng, tŭ do geh 13 rơndăp broă bơh lơgar Thái Lan gam geh tơngai lơh broă mờ kờp jơh khà priă bơcri di pơgăp 60 tơlăk dolar Mỹ, tơrgùm tàm ală gah kă bro, tăc phan ờ uă, lơh sa, phan mai, lơh gơs phan, bơ̆t bơtàu.

Tŭ do, ƀòn dờng Đà Nẵng geh 57 rơndăp broă lơh gam hòi jà bơcri priă tàm uă gah broă. Drà ràng tơlik dunia kă bro-lòt nhơl-bơcri priă Jăt gah lơh sa Đah măt tơngai lik – Đah măt tơngai mŭt sùm geh bơyai lơh tàm ƀòn dờng Đà Nẵng, hòi jà broă tus bal, dờp bal niam, geh cồng nha bơh ală mpồl lơh sa kă bro lơgar Thái Lan dê. Đơs tàm pơrjum, ồng Hồ Kỳ Minh, Phó Củ tịc UɃÑZ ƀòn dờng Đà Nẵng kơ̆p kờñ, Pơrjum là broă tơrbŏ bal niam, geh cồng nha tus mờ ală cau bơcri priă lơgar Thái Lan mờ jơh ală cau bơcri priă tàm lơgar tus mờ ƀòn dờng Đà Nẵng. Kwang đơng lam ƀòn dờng Đà Nẵng hơ dong kờl, ai tơl bơta niam nàng ală cau bơcri priă lơgar Thái Lan mờ ală cau bơcri priă tàm lơgar lơh jăt rơndăp broă, lơh sa kă bro geh cồng nha tàm ƀòn dờng Đà Nẵng.