Geh lơh bơh tŭ do tus ngai 5 sa tềp, lơh chờ sơnam pa Việt Nam Quý Mão 2023 geh pơn rơ mờ ù tiah “Gùng drà ồng đồ” bal mờ mờr 50 nă ồng đồ kơnòm să bal mờ gai cih sră pơr hê, nggui cih akhar niam chài nac in. Ù tiah lơh chờ geh bơka tai mờ rlau 100 tờm mai rơmit mòn gơs rùp niam chài dong nac lòt sền gơtùi git gŏ nùs nhơm nam pa tàm ƀòn dờng cèng mat sơnđan Bác Hồ. Bơdìh hơ̆ tai, tàm do kung geh lơh ală broă lơh nhơl ñŏ ngai sa tềp, bè: Mòn tò he, trah mòn phan mờ tê, sềr rùp, phan sa đèng zờu, anih ràng àu kap…

Tàm do gam geh uă broă lơh dong kờl is, gròi sền sa tềp ai làng bol in, bè: Broă lơh “Rơndeh sơnam pa” jun cau bơsram dờng rê hờ ƀòn tờm sa tềp, “Rơndeh bơ tòm mat” ai kông ñân rê hờ ƀòn tờm in, tìp mat cau bơsam dờng wă rò sơnam pa sa tềp ngài hìu… Tàm dơ̆ mut lơh, mpồl bơyai lơh neh jàu pà phan sa tềp ai kơnòm dềt geh rài kis kal ke, kơnòm dềt kòn đời tài bơh kòp Kovid-19 in.