VOV4.K’ho - Bồng bi pơrhê sơrmañ rơmit par lir hir tàm ală rơkàng hìu tàm ƀòn Drang Phôk, xã tiah nhàr dà lơgar Krông Na, kơnhoàl Buôn Đôn, càr Dăk Lăk là rùp niam, ai tơngŏ gơnoar tờm ù tiah tàm tiah nhàr dà lơgar. Ală bồng bi Dà lơgar pa geh pà dong kờl làng bol geh tơl bơta niam ala bồng bi lài do neh klar, nàng bồng bi pơrhê sơrmañ rơmit sùm geh par tàm ƀòn tiah nhàr dà lơgar.

                           Jào pà bồng bi Dà lơgar ai làng bol kis tàm ƀòn Drăng Phôk in

Dờp bồng bi Dà lơgar pa geh pà, lŏ H’ Bố Mlô, kis tàm ƀòn Drang Phốk, xã Krông Na, kơnhoàl Buôn Đôn chờ hờp ngan. Lŏ H’ Bố đơs, geh mhar yồng bồ bi pa do nàng ala mờ bồng bi neh klar yồng bơh nam lài. Uă nam do, yồng bồng bi Dà lơgar neh gơs broă lơh sùm bơh ală hìu tàm ƀòn Drang Phốk dê, bŭ lah ngai bè ờs ha là ngai kwơ màng, ngai satềp. Tơl hìu mờng mŭt tàm brê rơwah ală tờm gle song mờ jòng cèng rê nàng tồt yồng bồng bi tềng đăp hìu niam bơnĕ ngan. Lŏ H’ Bố yal: “Nam lơi tàm ƀòn ală hìu ndrờm geh dờp bồng bi den hìu añ ai bồng bi yồng tềng đăp hìu. Añ gŏ chờ hờp ngan, geh kwơ màng ngan tŭ dờp mờ yồng bồng bi, bè gơlơh pơnyờ să ngan, ai gŏ geh gơnoar tờm dà lơgar he dê”.

Tỉñ đoàn Dăk Lăk mờ Lâm Đồng jào pà 150 nơm bồng bi ai làng bol kis tàm ƀòn tiah nhàr dà lơgar Drang Phôk in di tàm broă lơh nhai 3 tàm tiah nhàr dà lơgar nam do

Ƀòn Drang Phôk là ƀòn ngài ngan kơnhoàl Buôn Đôn dê, ƀòn do geh tàm gùl brê dà lơgar Yok Đôn, ngài mờ gùng nhàr dà lơgar rềp mờ lơgar Campuchia mờr 50 kơi sồ. Ƀòn geh mờr 140 hìu mờ rơlao 500 nă làng bol, tàm hơ̆ geh 86% khà làng bol là kòn cau. Ồng Y Tê B.Krông, Ƀí thư Chi ƀộ ƀòn Drang Phôk pà git, tài kơnờm gah dà lơgar bơcri priă, ală nam pa do, muh măt ƀòn lơgar neh geh tam gơl, gơs niam bơnĕ rơlao. Kwơ màng bal mờ broă lam sồr bơh gơnoar atbồ ƀòn lơgar, làng bol neh lơh gơs bơta mờng yồng bồng bi Dà lơgar tềng đăp hìu mờ jăt gah ală gùng tàm ƀòn. Pah tŭ geh bồng bi lơi neh klar ha là ờ niam tai, làng bol geh ala mờ bồng bi pa mờ prăp gàr nền nòn. “Ală ngai chờ dờng, ngai kwơ màng bal mờ nam pa den geh dờp bồng bi pa, den tàng làng bol yồng bồng bi chờ gờm nam pa mờ ală ngai kwơ màng mờ nùs nhơm làng bol chờ hờp mờ pơnyờ să ngan. Do là broă lam sồr kờñ gơboh mờ dà lơgar mờ pơnyờ să mờ dà lơgar, chờ gờm ngan jai pha nàng bơh tŭ hơ̆ geh tam gơl nùs nhơm mờ rài kis bơh làng bol dê geh niam rơlao”.

                                     Ală bồng bi geh làng bol yồng niam bơnĕ ngan tềng đăp hìu

Tàm mpồl ală broă lơh tàm nhai pe tiah nhàr dà lơgar pa geh bơyai lơh, Tỉñ đoàn 2 càr Dăk Lăk mờ Lâm Đồng neh jào pà 150 nơm bồng bi Dà lơgar ai làng bol kis tàm ƀòn Drang Phôk in. Do là broă lơh bơh cau kơnòm să 2 càr nàng pơgồp bal tàm broă lam sồr nùs nhơm kờñ gơboh mờ ƀòn lơgar tàm tiah nhàr dà lơgar sùm tŭ lơi kung wèt nùs nhơm hờ Dà lơgar, bơ̆t bơtàu ƀòn lơgar tàm tiah nhàr dà lơgar ngai sơlơ pas gơs mờ niam bơnĕ. Bi Y Lê Pas Tơr, Phó Ƀí thư Thường trực Tỉñ đoàn Dăk Lăk pà git: “Bol añ kung geh jào ală bồng bi ai làng bol ơm kis tàm xã Krông Na in. Do là broă lơh mùl màl geh lam sồr làng bol pin dờn, iang nùs ơm kis mờ lơh broă sa bal mờ sền gàr gơnoar tờm ù tiah tàm tiah nhàr dà lơgar”.

Rùp bồng bi Dà lơgar par tàm bơta trồ tiah tơlir niam tiah nhàr dà lơgar sơlơ lơh niam bơnĕ rơlao nùs nhơm pơnyờ să bơh tơl nă làng bol kis tàm ƀòn tiah nhàr dà lơgar Drang Phôk dê. Yồng bồng bi Dà lơgar ờ mìng là bơta niam chài rơgơi, mờ gam tơlik nùs nhơm kờñ gơboh mờ dà lơgar bal mờ broă kah ưn ngài ală cau ling neh phi să chơ̆t màng tài bơta lơngăp lơngai Dà lơgar. Bơh tŭ hơ̆, lam sồr tơl nă làng bol, tàm hơ̆ uă ngan là rơnàng kơnòm să pơn jăt tai lơh broă, ai jơh bơta pràn tŭ gam kơnòm să nàng bơ̆t bơtàu mờ sền gàr ƀòn lơgar.

Cau cih H’ Xíu-Cau mblàng Ndong Brawl