Ci ƀộ thôn Đăk Ga, xã tiah nhàr dà lơgar Đăk Nhoong, kơnhoàl Đăk Glei, càr Kon Tum geh 23 nă đảng viên mờ ndrờm là kòn cau Jeh-Triêng dê lơm. Bơh broă rềp mờ làng bol, rềp mờ hìu lam lài bơh ală đảng viên dê, 112 hìu mờ mờr 360 nă làng bol kis tàm thôn Đăk Ga tus bal niam tàm broă sền gàr gùng nhàr dà lơgar. Nùs nhơm tam klăc, dong kờl bal tàm broă bơtàu tơnguh lơh sa hìu nhă bơh làng bol tàm thôn dê geh ngui. Ƀí thư Ci ƀộ mờ kung là Kwang atbồ ƀòn ồng A Cu pà git, pah nam tơl nă đảng viên tàm ci ƀộ ndrờm hơ mờ geh broă rơndăp lơh mùl màl jăt tơngu me bơsram mờ đòm jăt ơnà jăk Wa Hồ dê.

Să tờm ồng A Cu kung bè ală đảng viên ndai tàm ci ƀộ ndrờm gŏ broă bơsram mờ đòm jăt ơnà jăk Wa Hồ dê đềt mềt mờ mùl màl ngan. Ồng A Cu pà git: “Pah ngai añ bơsram mờ đòm jăt ơnà jăk bơh Wa Hồ dê là bơsram ală jơnau niam, broă lơh niam. Bơsram Wa Hồ tềm pềr pah ngai. Hơ̆ sồng ơm sa, bơsram đơs, lam làng bol lơh broă sa bơtàu tơnguh lơh sa hìu nhă, brồ guh lik klàs rơƀah kơl jăp”.

Nam 2023 lơh jăt Tơngu me bơh Tỉñ ủy càr Kon Tum ai “Bơsram mờ lơh jăt ơnà jăk, nùs nhơm niam, broă lơh bơh Hồ Chí Minh dê bè jơh nùs, đềt mềr, pơgồp bal tàm broă bơ̆t bơtàu càr Kon Tum bơtàu tơnguh mhar mờ kơl jăp”, ală ci ƀộ tàm ƀòn tiah jơi bơtiàn ờ gal cau bơh càr Kon Tum dê neh geh uă broă bơsram mờ đòm jăt Wa Hồ di pal mờ mùl màl bơh tơl ƀòn dê. Phó Ƀí thư Ci ƀộ bi A Vét, kòn cau Hrê, tàm thôn Vi Ô Lăk, xã Pờ Ê, kơnhoàl Kon Plông pà git, gŏ làng bol tàm thôn gam ờ git bè broă ròng phan mờ sền gàr kòi sre, tài neh git lài bè broă lơh sa suơn sre, den tàng bi neh dan geh tơngu me do mờ kơ̆p kờñ geh dong kờl làng bol bơtàu tơnguh lơh broă sa. Bi A Vét pà git: “Bè jơnau Wa Hồ bơto là đảng viên pal lam lài pal lòt lài, pal lơh lài hơ̆ sồng làng bol gŏ he lơh mờ đòm jăt bal. Bơh broă ròng phan añ neh kơlôi sơnơng, jòi sền nàng git, mblàng yal nàng làng bol in git ròng phan là pal lơh wàng kơl jăp niam, ƀañ gơtìp ƀơ̆ hơ̆ sồng geh pleh mờ kòp gơtờp. Tam kòi sre añ bơsram geh jơnau lơi geh cồng nha uă den mblàng yal nàng làng bol in”.

Là dùl tàm ală cau pơnrơ lài đảng viên jơi bơtiàn ờ gal cau dê geh jờng rơ tàm Pơrjum sền wơl broă lơh jăt Jơnau đơs pơn dŭt sồ 01 bơh Ƀộ Cíñ trị dê bè broă pơn jăt tai lơh jăt Jơnau sồr sồ 05 bơh Ƀộ Cíñ trị “bè lơh pràn bơsram mờ đòm jăt ơnà jăk, nùs nhơm niam, broă lơh Hồ Chí Minh dê” nam 2023-2024 geh Tỉñ ủy càr Kon Tum bơyai lơh di tàm tŭ tòmngai deh Wa Hồ nhai 05 lài do, Phó Ƀí thư Ci ƀộ mờ kung là Kwang atbồ ƀòn ồng A Huế, kòn cau Sơdàng, kis tàm ƀòn Kon Nhên, xã Đăk Ruồng pà git: “Bơsram mờ đòm jăt ơnà jăk, nùs nhơm niam, broă lơh bơh Hồ Chí Minh dê, să tờm añ kung neh lam sồr làng bol lơh geh cồng nha broă bơ̆t bơtàu ƀòn lơgar pa. Să tờm añ tus lam sồr làng bol dong kờl bal ngai lơh broă, lơh geh ù tiah niam gùt dar hìu Rông, lam làng bol tă priă nàng lơh niam wơl gùng lòt. Tam tờm chi jăt gah gùng dờng kung bè ală gơl gùng tàm ƀòn. Sền bơh mùl màl den tŭ do làng bol neh bơtàu tơnguh, ờ gam bè lài do tai”.

Bơh broă bơsram mờ đòm jăt ơnà jăk Wa Hồ, 03 nam do đảng viên tàm ală kơnhoàl, xã tàm càr Kon Tum neh lơh gơs rơlao 800 broă tơrlòng dong kờl bal bơtàu tơnguh lơh sa, lơh niam wơl suơn tam phan, sơbì bơhiàn ờ niam… bơh ală broă tơrlòng lơh do neh geh rơlao 6 rơbô 300 hìu làng bol jơi bơtiàn ờ gal cau rơƀah mờ rơlao 3 rơbô 300 hìu ndrờm rơƀah geh dong kờl sơntìl, priă, bơta chài tàm broă lơh nàng brồ guh tàm broă bơtàu tơnguh lơh sa. Phó Ƀí thư Duh broă sùm Huyện ủy kơnhoàl Ngọc Hồi ồng Phạm Hải Châu pà git, Đảng ƀộ kơnhoàl sùm ai broă bơsram mờ đòm jăt ơnà jăk Wa Hồ dê là kơnòl cíñ trị kwơ màng lài ngan. Do kung là bơta tờm kwơ màng lơh geh ală tam gơl niam gơwèt mờ kơnhoàl dê mờ làng bol jơi bơtiàn ờ gal cau geh tus mờr 60% khà kờp làng bol kơnhoàl dê.

Ồng Phạm Hải Châu pà git: “Broă đòm jăt ơnà jăk Wa Hồ neh tơnguh uă jơnau git wă tàm broă lơh mờ lơh geh nùs nhơm ring bal, dùl nùs tàm gùt Đảng ƀộ lơh jăt kơnòl cíñ trị, lơh sa mpồl bơtiàn, sền gàr dà lơgar lơngăp lơngai mờ bơ̆t bơtàu Đảng ƀộ mờ mpồl lơh broă cíñ trị. Tơnguh nùs nhơm pin dờn bơh làng bol dê gơwèt mờ Đảng. Broă bơyai lơh jăt tơngu me bơsram mờ đòm jăt ơnà jăk, nùs nhơm niam, broă lơh Hồ Chí Minh dê nền nòn neh gŏ uă broă tơrlòng lơh, broă lơh niam, lơh geh cồng nha geh gŏ mờ lơh uă”.

Lơh geh uă broă bơsram mờ đòm jăt ơnà jăk Wa Hồ, ală ci ƀộ tàm ƀòn làng bol jơi bơtiàn ờ gal cau càr Kon Tum neh geh ală broă pơgồp bal kwơ màng tàm broă lơh jăt ală jơnau kờñ bơtàu tơnguh Đảng ƀộ càr Kon Tum dê bè: tơnguh uă bơta niam bơ̆t bơtàu ƀòn lơgar pa, tơmù rơƀah kơl jăp; lơh geh cồng nha Dơ̆ lam sồr “Lơh tam gơl bồ tơngoh kơlôi sơnơng, broă lơh bơh làng bol jơi bơtiàn ờ gal cau dê, lơh làng bol jơi bơtiàn ờ gal cau brồ guh lik klàs rơƀah kơl jăp”… Broă ngui niam gơnoar lam lài tàm broă bơsram mờ đòm jăt ơnà jăk, nùs nhơm niam, broă lơh Hồ Chí Minh dê bơh đảng viên gam lơh geh uă bơta pràn mờ ơnàng tàm ală tiah bè bơta kwơ màng bơh broă bơsram mờ đòm jăt ơnà jăk Wa Hồ dê tàm ƀòn tiah làng bol jơi bơtiàn ờ gal cau càr Kon Tum dê.