VOV4.K’ho - Pơgăp mờ do 55 nam (ngai 24/6/1967), lơgar Việt Nam mờ lơgar Campuchia mùl màl crơng gơs broă lơh bal mờ ngai do neh mŭt tàm rài kah yau đah bàr lơgar dê bè dùl broă lơh kwơ màng, pờ geh dùl tăp pa tàm bơta git gơ̆p đah bàr lơgar dê, đềt mềr bal đah bàr jơi bơtiàn kis rềp bal. Bŭ lah gơtìp ală bơta kal ke tàm rài lài do mờ ală bơta tam gơl bơh rài tŭ do, broă lơh git gơ̆p đah lơgar Việt Nam mờ Campuchia kung gam ngai sơlơ đềt mềr, ală rơnàng kwang bàng đơng lam mờ làng bol bàr lơgar geh bơ̆t bơtàu sùm, prăp gàr, gơs phan bơna kwơ màng đah bàr lơgar dê.

                                                Ƀộ trưởng Ngoại giao ồng Bùi Thanh Sơn

55 nam là dùl tơngai ờ jŏ di lah pơn drờm mờ bơta jŏ jòng rài lài do bơh broă lơh git gơ̆p bal đah bàr lơgar dê, mơya là dùl tơngai geh kwơ màng ngan tàm broă lơh git gơ̆p đah bàr lơgar dê. Hơ̆ là tơngai mờ làng bol lơgar Việt Nam bal mờ làng bol lơgar Campuchia sùm lơh broă bal tàm broă tơnklàs dà lơgar mờ bơ̆t bơtàu dà lơgar ring lơngai, làng bol gơboh gơbài, hờm ram.

Nùs nhơm tam klăc bal, nùs nhơm dong kờl bal đah bàr jơi bơtiàn kòn cau he dê là bơta pràn nàng bàr lơgar geh dong kờl bal lơh jai pha rài Polpot, ai dà lơgar Campuchia kis wơl mờ broă lơh git gơ̆p tơnguh bơtàu pràn kơl dang bè tŭ do. Tiến sĩ Kin Phea, Phó Kwang atbồ Viện Hàn lâm lơgar Campuchia đơs là: “Broă lơh bal, nùs nhơm tam klăc bal, git gơ̆p bal mờ dong kờl bal bơh cau ling lơgar Việt Nam gơwèt mờ lơgar Campuchia geh bơta kwơ rài lài do dê sùm mờ ờ geh bơta lơi kờñ tơn jơh. Broă dong kờl bơh lơgar Việt Nam gơwèt mờ đah tam klăc bal tơnklàs dà lơgar Campuchia kwơ màng ngan, pơgồp bal tàm broă lơh gơlừ rài Khmer Đỏ mờ bơ̆t bơtàu wơl dà lơgar Campuchia”.

Ƀộ trưởng Ƀộ Quốk phòng lơgar Campuchia ồng Tea Banh mờ Ƀộ trưởng Ƀộ Quốk phòng lơgar Việt Nam ồng Phan Văn Giang kŭp rùp bal mờ kơnòm bơsram lơgar Campuchia

Ală cồng nha mờ lơgar Việt Nam mờ lơgar Campuchia neh lơh geh tàm 55 nam do, ờ mìng là cồng nha bơh dơ̆ tam lơh tơnklàs dà lơgar, mờ gam ai tơngŏ tàm broă tơnguh bơtàu broă lơh git gơ̆p tàm jơh ală gah broă tàm dơ̆ bơ̆t bơtàu mờ tơnguh bơtàu dà lơgar. Tàm rơlao 2 nam do, bŭ lah kòp Kovid-19 gơrềng ờ niam tus mờ broă tơnguh bơtàu tàm tơl lơgar, mơya broă lơh git gơ̆p đah lơgar Việt Nam mờ lơgar Campuchia kung gam geh chồl pràn sùm. Bàr lơgar tus bal tàm broă rơcang sơndră mờ kòp geh cồng nha, dong kờl bal mờ uă broă lơh, tàm hơ̆ geh bal nùs nhơm bal mờ phan bơna, phan lơh sơnơm, priă ngan, sơnơm vaccine. Bàr lơgar sùm pơgồp bal nền nòn, tam pà bal jơnau tơngit di tŭ mờ kờñ bal tàm ală pơrjum dunia mờ tàm tiah do, tàm hơ̆ uă ngan là tàm broă lơh bal bơh Mpồl tam klăc ală lơgar Đông Nam Á (ASEAN). Liên hợp quốk mờ ală mpồl lơh broă bal tiah dà dờng Mekong.

             Tổng Ƀí thư ồng Nguyễn Phú Trọng mờ Bơtau lơgar Campuchia ồng Norodom Sihamoni

Mờ broă prăp gàr, bơ̆t bơtàu bơh làng bol bàr lơgar dê, broă lơh git gơ̆p đah lơgar Việt Nam mờ lơgar Campuchia tŭ do gam tơnguh bơtàu niam bơnĕ jăt gùng dà broă lơh “lơgar rềp bal niam bơnĕ, git gơ̆p, lơh bơyô bal ờs mờng, lơh broă bal tơl ală bơta, kơl jăp jŏ jòng”. Đại sứ lơgar Việt Nam tàm lơgar Campuchia ồng Nguyễn Huy Tăng đơs: “He pơn jăt tai chồl pràn tàm gah cíñ trị gàr niam pơlam gùng dà broă lơh tơrgùm bal broă git gơ̆p đah bàr lơgar, chồl pràn broă bơto bơtê ală làng bol đah bàr lơgar, tàm hơ̆ uă ngan là rơnàng kơnòm să bè gơnoar, bơta kwơ màng mờ broă lơh jŏ jòng bơh broă lơh git gơ̆p đah lơgar Việt Nam mờ lơgar Campuchia kung bè bơta kwơ bơh bơta geh bơh broă lơh bal do dê. Nàng bơh tŭ hơ̆ geh tơnguh nùs nhơm pin dờn cíñ trị, ai geh bơnàng jă mpồl bơtiàn kơl jăp ai broă chồl pràn, tơnguh broă lơh git gơ̆p bal tơl ală bơta đah bàr lơgar. Bal mờ hơ̆, chồl pràn broă lơh bal tàm ală gah broă sền gàr bơta lơngăp lơngai dà lơgar mờ lơh broă bal mờ lơgar ndai. Do là ală bơta tờm kwơ màng tàm ală gah broă lơh git gơ̆p đah bàr lơgar, pơgồp bal tàm broă gàr niam tiah kis ai broă tơnguh bơtàu đah bàr lơgar dê. Mờ bơta kwơ màng là chồl pràn broă lơh sa bal, lơh geh bơta gơn kơnờm pa, ai geh bơta pràn gàr niam ai broă tơnguh bơtàu kơl jăp in tàm broă lơh git gơ̆p đah lơgar Việt Nam mờ lơgar Campuchia dê”.

Ngai 24/6/1967 là dùl bơta niam tàm rài broă lơh git gơ̆p, tam klăc bal, lơh bơyô bal ờs mờng, đềt mềr bal làng bol đah bàr lơgar Việt Nam mờ Campuchia. Nùs nhơm git gơ̆p, lơh bơyô bal ờs mờng đah làng bol bàr lơgar Việt Nam mờ Campuchia tàm 55 nam do neh pơgồp bal kwơ màng tàm ală cồng nha neh lơh geh tàm tơl lơgar dê, là tơngu me tờm, bơnàng jă kơl jăp nàng bàr lơgar ngai sơlơ geh ai gŏ tàm rài lơh git gơ̆p mờ lơh broă bal, neh mờ gam geh kwang đơng lam bal mờ làng bol đah bàr lơgar prăp gàr mờ tơnguh, geh rơnàng kơnòm să đah bàr lơgar in git loh làng mờ bơ̆t bơtàu tai ală rơbàng git gơ̆p. Bi Sum So Phonl, cau bơsram dờng lài do tàm hìu bơsram Đại học Prea Say Ha Mu Ni Ria đơs: “Añ chờ hờp ngan mờ pơnyờ să ngan tài dà lơgar añ dê neh bơ̆t bơtàu geh nùs nhơm git gơ̆p, tam klăc bal mờ lơgar Việt Nam. Nùs nhơm git gơ̆p lơh bơyô do neh dong kờl 2 lơgar he geh bơta ring lơngai, ring niam mờ tơnguh bơtàu. Ală lơgar rềp bal pal geh dong kờl bal hơ̆ sồng tơnguh bơtàu kơl jăp. Ală cau kơnòm să bè bol añ pal geh kơnòl prăp gàr broă lơh git gơ̆p kwơ màng do”.

Bal mờ broă hùc bal dà dờng Mekong, lơgar Việt Nam mờ lơgar Campuchia geh bal rài kis. Ală cồng nha kwơ màng neh lơh geh tàm tơl lơgar dê, broă lơh bal jrô ơnàng mờ geh cồng nha tàm 55 nam do là ală jơnau yal loh làng ngan mờ mùl màl ngan, niam bơnĕ ngan bè broă lơh git gơ̆p, lơh broă bal đah lơgar Việt Nam mờ lơgar Campuchia dê.

Cau mblàng Ndong Brawl