Bulah bè hơ̆, tŭ lòt jòi git nền nòn den khà kwang bàng, kông chức, viên chức cau jơi bơtiàn dồ êt nă cau tàm bàr pe anih lơh broă, mpồl lơh broă, sở, gah broă lơh kâp càr; cơldŭ lơh broă, mpồl lơh broă ờs mờng kâp kơnhoàl, ală mpồl lơh broă dà lơgar gam dồ êt, rơndap tap sèng ờ hềt ring bal; broă lơh rơ wah, ntrờn tàm pơ dar, pồ, rơndap kwang bàng cau jơi bơtiàn dồ êt nă cau gam lơyài; broă rơndap lài, bơto bơtê, bơto pơlam, rơndap ngui kwang bàng cau jơi bơtiàn dồ êt nă cau tàm bàr, pe tiah, mpồl lơh broă ờ hềt ring bal, cồng nha cèng wơl ờ hềt uă… Bal mờ hơ̆, geh uă kwnag bàng, kông chức, viên chức cau jơi bơtiàn dồ êt nă cau neh geh bơto bơtê mơya kung ờ hềt huan geh bè pràn jak atbồ, mờng chài lơh broă.

Deh tàm hìu bơnhă geh bơhiàn kac màng, mè là cau Sơdàng, bèp là cau Yoan, mò Nguyễn Thị Liên, Ƀí thư Huyện uỷ kơnhoàl Đăk Hà song dơpă đơs, bal mờ broă lơh gơlik bơta niam bơh kâp ủy, gơnoar atbồ dê, kwang bàng cau jơi bơtiàn dồ êt nă cau pal lơh ngan nàng jai rlau mờ să tờm he dê: “Mùl màl añ gŏ là bàr, pe nă kwang bàng là cau jơi bơtiàn dồ êt nă cau là nùs nhơm, geh kơnòl, ngan ngồn den añ gŏ ờ huan ngac ngar mờ mờng ngan lơh nùs. Hơ̆ sồng bơta niam kwang bàng gơ wèt Mpồl lơh kơnòl broă sùm Huyện ủy kơnhoàl atbồ bàr, pe nă kwang bàng den pràn jak đơng lam bồ ală broă bè cíñ trị, lơh sa, niam chài ờ hềt geh bơta bơceh lơh, ờ hềt ngac ngar. Kwang bàng cau jơi bơtiàn dồ êt nă cau pal geh bơta lơh ngan uă rlau tai”.

Tềng đap jơnau sồr tàm tŭ tơngai rài pa, bơta tơnguh khà, tơnguh bơta niam mpồl kwang bàng cau jơi bơtiàn dồ êt nă cau bơh càr Kon Tum dê gam geh ai tơlik dồ bă jal mhar ngan. Bulah bè hơ̆, mùl màl ai gŏ, bulah càr gam lơh jat jơnau đơs kwang bàng ờ pràn, ờ tơl bơta lơi den bơto pơlam bơta hơ̆ mờ sền gròi tus bơto pơlam bơta chài atbồ, đơng lam, sồr lơh, mơya broă lam lơh gơtìp dồ ròt ală kòl yan gơ rềng tus broă lơh bơto bơtê, bơto pơlam lơh kwang bàng jơi bơtiàn dồ êt nă cau ờ huan geh tŭ niam nàngt ơnguh mờng chài lơh broă. Ồng Lê Viết Nam, Phó Kwang atbồ Sở Nội vụ càr Kon Tum đơs là, ală kòl yan do pal geh tă bơsong sơrbac mhar: “Tŭ do Jơnau lơh nền bơh Cíñ phủ dê mờ Jơnau pơlam là mìng geh kông chức geh bơto bơtê, bơto pơlam den hơ̆ sồng geh dong kờl. Ai viên chức den cau atbồ mpồl lơh broă pal tă priă mờ tŭ do gam lơh jat broă lơh tờm is, cau atbồ mpồl lơh broă mờ ai oh mi viên chức lòt bơsram hơ̆ sồng ai priă bơh mpồl lơh broă dê den ndrờm bè broă do kal ke ngan. Tàm tơngai pa do, uă ngan viên chức là lòt bơsram is. Tŭ do, broă lơh bơto bơtê, bơto pơlam khat dùl ơdŭ lơi kung pal jat broă lơh tàm pơrlòng giă, broă rơndap lơh sră nggal kal ke ngan”.

Tàm ală nam do, dùl bơta lơh geh lài kuơmàng bơh broă lơh bơt bơtàu, lơh geh lài kwang bàng jơi bơtiàn dồ êt nă cau tàm càr Kon Tum là ală hìu bơsram kòn cau. Oh kòn ală jơi bơtiàn dồ êt nă cau tàm càr geh Đảng, Dà lơgar mờ gơnoar atbồ càr ròng siam, bơto bơtê. Bulah bè hơ̆, jat mò Y Ngọc, Phó Củ tịc Anih duh broă làng bol càr Kon Tum đơs, tài broă dong kờl mìng geh lơh tus tŭ ală oh bơsram jơh ơdŭ 12 den tàng uă oh bulah geh cồng nha bơsram sră jak mơya kung ờ gơtùi pơn jat tai bơsram đại họk. Bè hơ̆ den tàng pal geh broă dong kờl lài nàng kờñ geh kwang bàng jơi bơtiàn dồ êt nă cau bơh ală hìu bơsram kòn cau: “Ròng siam, bơto bơtê ală oh tus ơdŭ 12 den ală oh kung ờ gơtùi lòt bơsram tai. Dùl nă kơnòm bơsram lòt bơsram đại họk, dùl nam priă bơsram pal tă bơh 25 tus 30 tơlak đông den ală oh ờ geh. Càr sồr ală oh lòt bơsram mờ khà uă bè do kung ờ geh priă jền dong kờl. Dà lơgar, Quôk hội kung kơlôi sơnơng gơ wèt mờ kơnòm bơsram jơi bơtiàn dồ êt na wcau tiah kal ke tŭ mờ lòt bơsram đại họk den gơtùi dong lài, dong ală oh priă bơsram bơh 20 tus 30%, gam wơl den dà lơgar dong kờl”.

Pa do, tàm dơ̆ lơh broă jat sền mìng dùl tơngume broă lơh jat broă lơh adat boh lam bè broă lơh kwang bàng gơ wèt mờ mpồl kwang bàng cau jơi bơtiàn dồ êt nă cau, tơngai bơh nam 2016 tus nam 2023 tàm càr Kon Tum, ồng Y Thanh Hà Niê Kđăm, Kwang geh jơng tàm Đảng dà lơgar, Kwang geh jơng tàm Anih duh broă Lơh kơnòl broă sùm Quôk hội, Củ tịc Mpồl duh broă Jơi bơtiàn Quôk hội bal mờ broă cih dờp jơnau đơs, jơnau dan bơh càr Kon Tum dê tàm broă lơh bơt bơtàu mpồl kwang bàng cau jơi bơtiàn dồ êt nă cau kung đơs nền tai: “Càr pơn jat tai sền gròi tus broă gơ hòi gơ jà, rơndap ngui mpồl kwang bàng, kông chức, viên chức cau jơi bơtiàn dồ êt nă cau dipal mờ bơta krơi is càr dê. Tàm hơ̆ sền gròi tus tơnguh bơta niam, cồng nha bơto bơsram dà kòn cau, lơh geh bơta rềp mềr mờ làng bol, làng bol git mờ tam pà bal mờ làng bol. Sơlơ tơnguh tai broă sồr lơh, sùm lòt sền, sền sơ wì broă lơh jat ală gùng dà, broă lơh bơh Đảng, dà lơgar, càr dê bè broă lơh kwang bàng gơ wèt mờ mpồl kwang bàng jơi bơtiàn dồ êt nă cau”.

Nàng gơtùi geh ală kwang bàng cau jơi bơtiàn dồ êt nă cau “geh nùs nhơm niam mờ broă lơh jak”  bal mờ lơh ngan tă bơsong kal ke, càr Kon Tum kung gam lam lơh broă lơh sac rơ wah, rơndap lài, bơto bơtê lài, pồ… jat jơnau pal jat loh làng, ring bal, song dơpă, lơh gơlik bơta niam nàng kwang bàng cau jơi bơtiàn dồ êt nă cau iang nùs pơlam tàp mờ tă pơgồp.

Đal git broă lơh rơndap broă, kwang bàng bè jơnau nting bơr lời wơl bơh ƀồc Tổng Ƀí thư ồng Nguyễn Phú Trọng dê pal là tam gơl pràn, là “dờng màng” bơh kơnòl broă “dờng màng” dê, geh gơ rềng tus bơta kis gơs  bơh Đảng, bơh rài atbồ dê, jơh gùt Đảng ƀộ càr Kon Tum gam lơh jat niam Jơnau sồr bơh Ƀộ Cíñ trị dê bè pơrjum dờng Đảng ƀộ ală kâp, wèt tus Pơrjum dờng cau ala mat gùt lơgar dơ̆ XIV bơh Đảng dê, tàm hơ̆ lơh ngan lơh geh mpồl kwang bàng cau jơi bơtiàn dồ êt nă cau tơngai bơh nam 2025 tus nam 2030 mờ broă rơndap lơh tus nam 2045 “geh nùs nhơm niam mờ broă lơh jak” nàng gơ in kơrnal kơnhăp, mpồng kơljap.