Tàm dơ̆ wă, Thủ tướng chờ hờp sền gŏ bơta git gơ̆p Tam klăc bal Jŏ jòng Tơl ală bơta đah lơgar Việt Nam mờ lơgar Nhờk bơtàu tơnguh pràn kơl dang, geh cồng nha, mùl màl tàm ală gah broă, mờ nùs nhơm pin dờng cíñ trị uă.

Lơgar Nhờk pơn jăt tai là lơgar lơh sa kwơ màng lài ngan lơgar Việt Nam dê, là lơgar ai priă dong kờl ODA mờ lơh bal lơh broă lài ngan, cau bơcri priă ơm dơ̆ pe, lơgar kă bro phan mờ lòt nhơl ơm dơ̆ poan lơgar Việt Nam dê. Tàm tơngai tus, nàng pơgồp bal tàm broă ai bơta git gơ̆p Tam klăc bal Jŏ jòng Tơl ală bơta đah lơgar Việt Nam mờ lơgar Nhờk ngai sơlơ nền nòn, mùl màl, tơl ală bơta, Thủ tướng ồng Phạm Minh Chính sồr càr Yamaguchi lơh pràn broă lơh bal mờ càr Bình Dương bal mờ ală càr, ƀòn dờng ndai tàm lơgar Việt Nam bè lơh sa, kă bro phan, bơcri priă, lam sồr ală mpồl lơh sa kă bro tàm càr rề ơnàng bơcri priă, tơnguh broă blơi phan, tàm hơ̆ uă ngan là ală bơta phan geh pơnrơ lơgar Việt Nam dê.