Tàm nùs nhơm niam nền nòn, tàm săp jơnau uh, teh “Huềng soàn cau chơ̆t” ưn ngài mờ kah kơlôi, rơlao 30 nă kơnòm bơsram geh pơnrơ tàm 07 xã tiah nhàr dà lơgar càr Dăk Nông neh chu ñàng, pơdơng bơkào tềng Anih kah kơlôi ală Cau ling chơ̆t màng Pôs ling sền gàr tiah nhàr lơgar mpồng nhàr dà lơgar Bu Prăng, xã Bu Prăng, kơnhoàl Tuy Đức dê.

Do là dùl bơnah tàm broă lơh “Dơ̆ bơsram tiah nhàr lơgar” geh Cau ling sền gàr tiah nhàr lơgar càr Dăk Nông bơyai lơh ai ală kơnòm bơsram in. Tàm do, ală kơnòm bơsram geh iăt yal bè broă tam lơh, phi să khi cha jăk chài bơh ală rơnàng ồng pàng lài do dê, tàm hơ̆ is ồn ngan là 16 nă cau ling chơ̆t màng Pôs ling sền gàr Tiah nhàr lơgar mpồng nhàr Dà lơgar Bu Prăng Khin cha jăk chài neh tam lơh tus tăc nhơm tơn nàng sền gàr tiah nhàr lơgar Bu Prăng. Ală jơnau git wă rài lài kwơ màng do neh lơh ală kơnòm bơsram ngoh rơngăc ngan, bơ̆t bơtàu nùs nhơm kờñ gơboh Dà lơgar ai ală kơnòm bơsram in. Oh Y Dũng, bơsram ơdŭ 7A5, Hìu bơsram Kấp 2 Nguyễn Huệ, xã Thuận An, kơnhoàl Dăk Mil, là kòn ròng Pôs ling sền gàr tiah nhàr lơgar Thuận An dê yal. “Tŭ geh tus bal ơdŭ bơsram tơn tàm ñjrong nhàr lơgar, kòn gŏ pơnyờ să ngan bè dà lơgar kờñ gơboh kòn dê. Kòn kờñ ngan geh uă dơ̆ bơsram bè do tai. Tơnơ̆ do dờng kòn kơ̆p kờñ gơs cau ling, nàng sền gàr ñjrong nhàr lơgar mờ sền gàr dà lơgar kòn dê”.

Tus bal broă lơh “Dơ̆ bơsram nhàr lơgar”, bal mờ cuh ñàng, pơdơng bơkào tàm Anih kah kơlôi ală cau ling chơ̆t màng, ală kơnòm bơsram gam geh ală cau pơgru soh phan ling lam lòt sền, lơh ală broă tàm gùng lòt sền, ñjrong nhàr lơgar, tiah sền gàr cau, rơndeh lòt rê tàm tiah nhàr lơgar… Tus lơh bal, iăt ală jơnau git wă, ală bơta ờ hềt geh tàm pang sră bơsram mờ kwơ màng ngan neh bơ̆t bơtàu nùs nhơm kờñ gơboh ƀòn lơgar, Dà lơgar mờ geh bơtơl tai bơta pràn nàng ală kơnòm bơsram in bơsram sră.

Dơ̆ sơnrờp geh tus bal broă lơh “Dơ̆ bơsram nhàr lơgar” tềng ñjrong nhàr lơgar sồ 55, oh Triệu Thị Cẩm Nhung, bơsram ơdŭ 9A, Hìu bơsram Kấp 1 mờ Kấp 2 Bế Văn Đàn, xã Thuận Hà, kơnhoàl Dăk Song chờ hờp ngan bè ală broă lơh tàm mùl màl pà git: “Kòn gŏ dơ̆ bơsram do chờ hờp ngan mờ geh uă broă lơh mùl màl rơlao tŭ kòn bơsram tàm hìu bơsram dê. Tŭ geh lơh mờ geh bơsram bơh jơnau bơsram tàm do den kòn gŏ nùs nhơm kờñ gơboh dà lơgar gơguh uă rơlao mờ gŏ să tờm pal geh nùs nhơm, geh kơnòl sền gàr tiah nhàr lơgar rơlao”.

Nam do là nam sơnrờp broă lơh “Dơ̆ bơsram nhàr lơgar” geh Cau ling sền gàr Tiah nhàr lơgar càr Dăk Nông bơyai lơh tàm jơh ală pôs ling sền gàr tiah nhàr lơgar tàm 07 xã nhàr lơgar, gơwèt 04 kơnhoàl là Cư̆ Jút, Dăk Mil, Dăk Song mờ Tuy Đức. Lài mờ hơ̆, bơh nam 2018, Pôs ling sền gàr Tiah nhàr lơgar Tuy Đức, kơnhoàl Tuy Đức là mpồl sơnrờp ngan bơh càr Dăk Nông dê bơyai lơh broă do mờ măt sơnđan lài ngan là dơ̆ bơsram tiah nhàr lơgar. Mờr 07 nam do, pôs ling do sùm geh sùm broă lơh kwơ màng do. Thiếu tá Nguyễn Văn Nga, Cíñ trị viên phó Pôs ling sền gàr tiah nhàr lơgar Tuy Đức pà git, bơh broă lơh do, pôs ling kơ̆p kờñ pơgồp bal dong kờl làng bol, kơnòm bơsram tàm tiah nhàr lơgar git, wă rơlao tai ală jơnau geh ai pal lơh jăt tŭ lòt rê, lik mŭt tàm tiah nhàr lơgar, wă tai bè gơnoar, kơnòl bơh Cau ling sền gàr tiah nhàr lơgar dê.

Mờ bơh tŭ hơ̆, bơ̆t bơtàu, lơh geh uă nùs nhơm kờñ gơboh Dà lơgar ai làng bol mờ kơnòm bơsram tàm tiah nhàr lơgar in. Thiếu tá Nguyễn Văn Nga pà git: “Kung kơ̆p kờñ lơh geh uă nùs nhơm kờñ gơboh nhàr lơgar, ù tiah Dà lơgar dê gơwèt mờ ală kơnòm bơsram. Bol añ kung kơ̆p kờñ bơto ală rơnàng, ală kơnòm bơsram bal mờ làng bol ờ mìng tàm tiah nhàr lơgar mờ tàm ală xã tàm dơlam geh tus bal sền gàr kơl jăp gùng nhàr lơgar, ñjrong nhàr lơgar”.

Ală dơ̆ bơsram tiah nhàr lơgar mùl màl, niam mờ geh kwơ do gam geh uă tàm ală xã tiah nhàr lơgar càr Dăk Nông dê. Bơh ală dơ̆ bơsram tus bal do neh dong kờl ai ală kơnòm bơsram in geh tai ală jơnau git wă mùl màl, mờ bơ̆t bơtàu nùs nhơm kờñ gơboh ƀòn lơgar, Dà lơgar, geh tai bơta pràn ai ală kơnòm bơsram in lơh ngan bơsram sră nàng gơtùi gơs ală làng bol geh kwơ. Kung bơh tŭ do, pơgồp bal bơ̆t bơtàu broă gùt làng bol sền gàr tiah nhàr lơgar bơh Dà lơgar dê.