Là dùl tàm 4 ƀòn tiah nhàr dà lơgar càr Kon Tum dê, tơnơ̆ 9 nam crơng gơs, Ia H’ Drai neh geh ală tam gơl uă ngan tàm lơh sa mờ kơl jăp rài kis làng bol. Neh geh tŭ là tiah ù gơtìp lời gời tài geh uă bơta chơ̆t jê bơh rài tam lơh, tŭ do Ia H’ Drai neh tơlir niam bơh phan tam jŏ nam, tờm chi sa plai mờ wàng ròng phan. Gùng lòt tàm xã Ia H’ Drai kung geh niam tus mờ ală xã mờ tus ală kơnhoàl rềp bal, gơwèt bàr càr Gia Lai mờ Kon Tum, ai geh tai bơta ƀuơn lơh sa kung bè pơn diang phan geh lơh bơh lơh sa suơn sre dê.

Tus xã Ia H’ Drai ơm kis mờ lơh broă mờ bàr mpàng tê soh, kơnờm mờ khin cha bal mờ tơriang lơh broă sa, lŏ Phan Thị Sương kis tàm thôn 1, xã Ia Tơi pà git, tŭ do hìu nhă neh geh suơn tam phan jŏ ngai mờ tờm chi sa plai kờp jơh geh 6 lồ ù, priă geh pah nam git nđờ rơhiang tơlăk đong. Lŏ Phan Thị Sương pà git: “Lài ngan tus tàm do cau lơi kung đơs tam kơphe là ờ geh plai. Lài ngan tam 500 tờm. Tam tus nam dơ̆ 3 tờm kơphe gŏ hòn gơs niam mờ plai kung uă. Tam tai, tam sùm geh 2 rơbô 500 tờm. tàm do gơdờp ngan là tờm chi sa plai, tàm hơ̆ uă ngan là tờm pơnăt, sầu riêng mờ kroăc, plai bung. Tus tŭ do den añ đơs ngan lòt tàm ală tiah lơh sa ờ ndrờm mờ tàm do. Hìu nhă lơh ngan tàm do mờ đềt mềr mờ ù tiah do tus tàm tŭ chơ̆t tơn”.

Bŭ lah geh lơh ờ hềt jŏ, mơya uă gah lơh sa tàm kơnhoàl Ia H’ Drai tŭ do gam lam lài càr Kon Tum dê. Bal mờ di pơgăp 25 rơbô lồ ù tam kao su gam kă bro còr bơsơ̆t, kơnhoàl gam geh bă ù tam prìt tăc mờ lơgar bơdìh mờ broă ròng ka uă ngan càr dê. Pe nam do, khà gơmù rơƀah pah nam bơh kơnhoàl geh rơlao 19% mờ tŭ do khà hìu rơƀah tàm kơnhoàl mìng gam hờ đơm 8%.

Ồng Võ Anh Tuấn, Củ tịc UɃÑZ kơnhoàl Ia H’ Drai pà git, kơnhoàl gam wèt tus jơnau kờñ tus lồi nam 2025 kơnhoàl geh lơh ală khà broă bơ̆t bơtàu ƀòn lơgar pa. Ồng Võ Anh Tuấn đơs: “Kơnhoàl geh ală khà broă bè bơ̆t bơtàu ƀòn lơgar pa tàm ală xã tàm kơnhoàl dê pal geh dùl xã lơh gơs broă bơ̆t bơtàu ƀòn lơgar pa tơnguh uă. Tŭ do bol añ neh lơh broă rơndăp lơh tàm nam 2024 xã Ia Tơi geh lơh gơs broă bơ̆t bơtàu ƀòn lơgar pa mờ xã Ia Dom geh khà ală khà broă bè bơ̆t bơt bơtàu ƀòn lơgar pa tơnguh uă mờ xã Ia Đal kung pơn jăt tai kơ̆ kơl jăp rơlao ală khà broă mờ bol añ neh lơh geh. Bè broă kơnhoàl lơh gơs broă bơ̆t bơtàu ƀòn lơgar pa, làng bol kis tàm kơnhoàl geh nùs nhơm ring bal uă ngan mờr 100%”.

Tàm ală ngai nhai 3 rài kah yau, bàr gah gùng Trường Sơn tơl lòt gan càr Kon Tum, bŭ lah gam tàm tơngai prang dờng, mơya kung gam tơlir niam bơh phan tam jŏ tơngai, tờm chi sa plai dê. Tàm tiah tơrbŏ Đah măt tơngai lik – Đah măt tơngai mŭt Trường Sơn geh gùng 18A, 18B tus càr Attapư, lơgar Lào tàm rài tam lơh tŭ do là thị trấn Plei Kần, kơnhoàl Ngọc Hồi dê neh ai gŏ muh măt bơh dùl thị xã tiah nhàr dà lơgar dê.

Kung bơh tàm tiah tòm tam lơh cui rơcai do bơh ling rơndeh par mờ ling tàm tiah ù lơgar Mỹ-Ngụy dê tàm rài tam lơh tŭ do lòt tai di pơgăp 18 kơi sồ wèt hờ tiah đah măt tơngai mŭt là tus mpồng nhàr dà lơgar dunia Bờ Y, mpồng kă bro dờng ơnàng bal mờ ală càr đah jum lơgar Lào, tiah đah tô măt tơngai lik lơgar Campuchia, Thái Lan mờ Myanmar dê.

Ồng Huỳnh Quốc Trung, Kwang atbồ Mpồl atbồ Tiah lơh sa càr Kon Tum pà git, mpồl do gam lơh ngan jơh pràn nàng gùng lòt kă bro mờ lơh sa tiah nhàr dà lơgar càr dê bơtàu tơnguh ndrờm bal mờ bơta geh bal mờ bơta kwơ krơi is. Ồng Huỳnh Quốc Trung pà git: “Mpồl atbồ lơh pràn rơlao tai broă lơh niam sră nggal nàng ai geh bơta niam bơcri priă ƀuơn, niam nàng tơnguh broă hòi jà bơcri priă tàm broă kă bro, kă bro tiah nhàr dà lơgar, gùng kă bro tàm Tiah lơh sa mpồng nhàr dà lơgar Dunia Bờ Y bơh ală mpồl lơh sa kă bro tàm lơgar mờ lơgar bơdìh.

Pơgồp bal mờ ală anih lơh broă geh gơnoar, ai tơl bơta ƀuơn nàng cau kă bro bal mờ làng bol ơm kis tàm tiah nhàr dà lơgar tàm broă kă bro, tam gơl phan kă bro gan nhàr dà lơgar di jăt mờ kơrnoăt tàm adăt boh lam dê. Jơnau sồr lơh geh ală broă nàng hòi jà ală mpồl lơh sa kă bro bơcri priă bơ̆t bơtàu phan bơna kă bro tàm Tiah lơh sa mpồng nhàr dà lơgar Bờ Y nàng drơng broă tăc mờ blơi phan kă bro mờ lơgar bơdìh”.

Kờp tus jơh nhai 2 nam 2024, tàm 13 xã jăt gah gơl gùng nhàr dà lơgar jòng rơlao 292 kơi sồ rềp bal mờ lơgar Lào mờ lơgar Campuchia gơwèt 4 kơnhoàl càr Kon Tum dê neh geh 7 xã geh khà bơ̆t bơtàu ƀòn lơgar pa. ală bơta niam tàm broă bơtàu tơnguh lơh sa mpồl bơtiàn tàm gơl gùng Trường Sơn ndu gơnrơh lài do gơl lòt gan càr Kon Tum gam ngai sơlơ geh uă rơlao tai mờ bơta chờ bơh hờm ram, gơboh gơbài kung gam pơn jăt tai geh sùm.