VOV4.K’ho- Tơnơ̆ ală ngai ơm rlô sa tềp, ùr kwang bàng Quốc hội khóa 15, cau jơi bơtiàn kòn cau B’râu tàm càr Kon Tum Nàng Xô Vi rê wơl mờ cơldŭ bơsram mờ ală kơnòm bơsram kờñ gơboh. Cau cih ƀău Khoa Điềm, lơh broă sùm tàm tiah Tây Nguyên geh cih wơl ală bơta kơp kờñ bồ nam pa bơh ùr kwang bàng Quôk hội mờr 26 sơnam do dê.  

Bơh hìu tus anih lơh broă là hìu bơsram kấp 3 kòn cau càr Kon Tum tàm kơnhoàl tiah nhàr dà lơgar Ia H’Drai, ùr kwang bàng Quôk hội khóa 15 Nàng Xô Vi pal lòt gan gơl gùng jòng 150 kơi sồ mờ rơndeh măi. Bơta kuơmàng, gơl gùng mờ ùr kwang bàng Quôk hội lòt tus mờ ală kơnòm bơsram kờñ gơboh lòt jat gơl gùng nhàr lơgar rềp mờ 2 lơgar Lào, Campuchia. Rê wơl cơldŭ bơsram tơnơ̆ tơngai ơm rlô sa tềp, tìp wơl ală kơnòm bơsram là oh kòn jơi bơtiàn kòn cau dùl êt nă cau tàm dùl hìu bơsram tàm tiah nhàr dà lơgar, ùr kwang bàng Quôk hội Nàng Xô Vi tam pà bè bơta gròi sền mờ kơlôi sơnơng he dê: “Broă bơto bơsram kòn cau là broă mờ añ sền gròi uă ngan rlau jơh. Añ kơp kờñ lơh bè lơi pơyua tus ală kấp ủy Đảng, tus dà lơgar ală bơta kơlôi rơcang bơh cau pơgru tàm tiah nhàr dà lơgar mờ ală bơta kơlôi sơnơng bơh mè bèp dê, kuơmàng là gròi sền tus ală kal ke bơh ală oh dê gam gơtìp. Kòp Kovid-19 gơlik geh, gah bơto bơsram là gah kong gơ rềng tơn mờ gah bơto bơsram gơtìp gơ rềng uă ngan tài bơh nùs nhơm den tàng kơp kờñ mhar jơh kòp nàng ală oh gờñ lòt bơsram bè ờs mờ geh ală bơta pa rlau tai”.

Ồng Y Thanh Hà Niê Kđăm, Củ tịc Hội đồng Zân tộk bơh Quôk hội dê bal mờ Nàng Xô Vi pà phan làng bol B’râu in di sa tềp Ñâm Zần 2022

Là kử ñân sư phạm điạ lý, pơgru hìu bơsram kấp 3 kòn cau càr Kon Tum tàm kơnhoàl tiah nhàr dà lơgar Ia H’Drai, tam pà jơnau kah kir he dê tàm pơrjum dơ̆ dùl, Quôk hội khóa 15, ùr kwang bàng Quôk hội Nàng Xô Vi đơs song, gơ wèt mờ dùl nă cau ùr dềt tus càr lơgar, tus hìu lơh broă Quôk hội, bơta kơlôi sơnơng sơn rờp là ờ quèng, bàs sìl mờ geh bal rơngòt tai. Bơh tàm tìp ală kwang bàng, tàm tŭ lơh broă mờ ală ủy ƀan, bơta mờ Nàng Xô Vi gŏ pal lơh mơ hơ̆ là tam gơl să tờm mờ kơlôi sơnơng krơi rlau: “Tus mờ pơrjum dơ̆ 2 den añ rơcang lài jòi git mờ kơlôi sơnơng sră nggal uă rlau. Mờ tus tŭ tàm tìp mờ làng bol, tìp mat cau tĕ khà bè broă yal wơl dơ̆ lòt pơrjum he dê den añ pin dờn đơs nền là, să tờm he geh bơta lơh ngan mờ ngan là tơnơ̆ do añ geh pơn đơl pràn rlau tai”.

Ùr kwang bàng Quôk hội Nàng Xô Vi, gơ wèt Mpồl kwang bàng Quôk hội càr Kon Tum là cau jơi bơtiàn kòn cau B’râu. Tŭ do, kòn cau B’râu ơm kis tàm thôn Đăk Mế, xã tiah nhàr dà lơgar Pờ Y, kơnhoàl Ngọc Hồi, càr Kon Tum. Jơh gùt jơi bơtiàn kòn cau mìng geh 173 hìu bơnhă bal mờ 558 nă cau. Kwang bàng Quôk hội Nàng Xô Vi là bơta pơn iờ să bơh cau B’râu dê mờ kung là krơh niam bè nùs nhơm sơrlèt gan kal ke, brồ guh đơs nền is să tờm he dê mờ bơta kơp kờñ tă pơgồp ai bơta bơtàu tơnguh bơh mpồl bơtiàn dê in.

Kwang bàng Quôk hội Nàng Xô Vi mờ mpồl kwang bàng Quôk hội tàm dùl dơ̆ lòt lơh broă tàm xã Pờ Y, kơnhoàl Ngọc Hồi, càr Kon Tum

Tam pà bè ală bơta kơlôi rơcang mờ bơta kơp kờñ bồ nam pa Ñâm Zần 2022, ùr kwang bàng Quôk hội Nàng Xô Vi pà git: “Tơl nă kwang bàng Quôk hội ndrờm geh ală bơta kơp kờñ, bơta kơlôi sơnơng, bơta kơlôi rơcang tàm să tờm he dê, lơh bè lơi nàng làng bol he in ờ huan rƀah, ờ huan bòl glar kal ke. Mut tus nam pa kơp kờñ să tờm añ dê là kơryan gơtùi kòp Kovid-19 nàng làng bol he in lơh sa bè ờs. Là kwang bàng Quôk hội, nam pa añ kung geh lơh ngan brồ guh rlau, mblàng wơl, đơs song ală bơta kơp kờñ bơh cau tĕ khà dê tus mờ Quôk hội”.

Cau mblàng K’Duẩn