Là dùl tàm 5 mpồl ling tam lơh mut tơngklàs Sài Gòn, Quân đoàn 3 mờ kơnòl broă ai geh Ƀlàng rơndeh par Tân Sơn Nhất mờ Ƀộ Tổng Tham mưu- tiah tờm đơng lam bơh bòl sò tơm dê. Nàng ai geh mờ gàr geh ală jơnau kờñ dờng màng do di tàm ngai 30/04 kah yau, Quân đoàn neh geh ală broă lơh tam lơh ling klàng uă ngan bơta bơceh lơh pa, sơr băc mhar mờ kràñ cê jơh nùs. Trung tướng Nguyễn Quốc Thước, tŭ hơ̆ at gơnoar broă Kwang atbồ mpồl pơlam broă Quân đoàn 3, cau lam bồ tơn dùl mpồl ling mut tàm lơh tàm Sài Gòn neh yal ală kir sơn rai ờ tŭ lơi huĭ tàm ngai tơngklàs do.

Trung tướng Nguyễn Quốc Thước, đơs:“Ƀlàng rơndeh par Tân Sơn Nhất mờ Bộ Tổng Tham mưu neh geh tơngklàs jơh tàm tŭ 11 jiơ nggùl. Bè hơ̆, bơh tŭ 11 jiơ tus 11 jiơ nggùl jơh bal 5 tiah kờñ tơngklàs tàm Sài Gòn ndrờm geh tơngklàs dùl tŭ bal. Bơta ngoh rơngăc dờng ngan, tơnơ̆ tŭ ai geh Dinh Độc Lập, tơngklàs rau tŭ hơ̆ rê wơl tàm nùs nhơm bol añ pơn yờ să ngan, mơya geh dùl bơta hơ̆ là ờ geh Bác Hồ. Tŭ bol añ lơh ngan jơh nùs tam lơh mờ bol sò tơm lơgar Mỹ, Bác Hồ neh kòp kơn jơ̆ ngan, Bác Hồ đơs là: ală wa pơn đơl pràn lơh ngan tơngkàs mhar Sài Gòn nàng Bác Hồ in geh còp làng bol tiah đah Jum tàm nggùl lơgar pròc mhàm bal... Drim ngai tơnơ̆ tàm Anih pờ tơlik Jơnau đơs Việt Nam geh pờ tơlik jơnau đơs crih bơh ồng Phạm Tuyên dê, tơngume “Bè geh Bác Hồ tàm ngai chờ phan lin dờng”, tŭ hơ̆ bol añ hơ̆ sồng hừh nùs, Bác Hồ mut tàm do, làng bol tiah đah tô dà lơgar bơh cau bơceh jơnau đơs crih dê neh wă Bác Hồ mut bal mờ bol añ rau, den tàng tŭ hơ̆  gŏ tàm nùs nhơm lơngap lơngai".

Gùng lòt tus bơta pha lin kah yau ngai 30/4/1975 geh bơta tă pơgồp mhàm, ntìng bơh git nđờ tơlak nă cau kòn jak chài bơh làm gùt ù tiah dà lơgar dê. Lik lòt bơh ù tiah lơh chah Quảng Ninh, ală cau ling- ală cau tơnhàu chah tàm mat sơnđan Ƀiñ đoàn chah neh lơh geh uă jai pha, ờ ngòt chơt phi să, kong glar bòl bal mờ gơp cih gơs jơnau đơs crih khin cha jak chài pha lin dờng sơnam pa. Tơnơ̆ tŭ tus bal ală dơ̆ sò tơm kờñ tam lơh tàm Buôn Ma Thuột, uă cau ling Ƀiñ đoàn chah neh mut tàm Sài Gòn, mut tam lơh tàm ƀlàng rơndeh par Tân Sơn Nhất, Ƀộ Tổng tham mưu gơnoar atbồ rài Ngụy, gơlăng Độc Lập. Ồng Bùi Duy Thinh, tŭ hơ̆ là cau dong broă Kwang atbồ Tiểu ƀan quân lựk bơh Trung đoàn 28 dê kah wơl ngai 30/4 kah yau: “Tus 10 jơ drim, bol hi neh tam lơh mut tus mpồng tờm bơh Ƀộ Tổng tham mưu ling Ngụy Sài Gòn dê. Tus 11 jơ 30 phuk ngai, đah Gơlăng Độc Lập bol hi git kung neh tơngklàs sơl, bol hi tồt bồng bi tàm Ƀộ Tổng tham mưu Sài Gòn. Jơh gùt oh mi tam pà nàng tam lơh, ai wơl jơh ală ƀang kì, gai lơh tềl đơng pơlam bơh kwang đơng lam bồ Cao Văn Viên dê, ƀang kì bơh Nguyễn Văn Thiệu dê. Nùs nhơm tŭ hơ̆ gơ lơh krơi ngan, tus tŭ do kung ờ gơtùi đơs jơh sơl”.

48 nam neh lòt gan kờp bơh ngai tơngklàs tiah đah Jum dà lơgar- tơrgùm dùl dà lơgar, mơya nùs nhơm kah sùm ngai jơh gùt mpồl ling tơngklàs mut tam lơh tơngklàl Sài Gon kung gam pa ngan tàm nùs nhơm cau ling tus bal tam lơh dê. Chờ hờp tàm mpồl cau lơh ƀăo lơgar Việt Nam dê sơnrờp geh mat tàm Dinh Độc Lập di tàm klo ngai ngai 30/04/1975,  cau lơh ƀăo tiah tam lơh Trần Mai Hưởng, lài do là Kwang atbồ dờng Thông tấn xã Việt Nam neh cùp wơl rùp hin pơrya tam lơh pha lin mờ tơngume “Rơndeh ơtang ling tơngklàs mut tàm Dinh Độc Lập tàm klo ngai, ngai 30/4/1975" mờ uă jơnau cih ƀăo bè ngai tơngklàs kah yau dê. Cau lơh ƀăo Trần Mai Hưởng pà gĭt, tŭ rơndeh com măng ca pơndiang mpồl cau lơh ƀăo mut rềp tàm ƀòn dờng ală gar phàu ling sò tơm dê kung gam cuh sùm, rơndeh pơndiang cau lơh ƀăo sùm lòt jat rềp rơndeh sơtăng nàng pleh gơtìp cuh di. Mơya mut tus ƀòn dờng là ù tiah ƀòn lơgar krơi is, làng bol chờ hờp tuh lik tàm gùng wă  rò mpồl ling tơngklàs.

Cau lơh ƀăo tiah tam lơh Trần Mai Hưởng, đơs:“Làng bol chờ hờp ngan, pà phan mờ cèng bal dà hùv ai oh mi in. Dùl nă kòn klau dềt pơgap 13, 14 sơnam hàu guh tàm rơndeh bơh cau lơh ƀăo dê, klau pơnu dềt ñă tàm rơndeh mờ driau dờng là: tơngklàs rau, tơngklàs rau. Ai làng bol 2 gah gùng tus ùt kuar mpồl ling, kŭp tê chờ hờp mờ đơs crih. Đơs ală jơnau đơs crih bè “Tiến về Hà Nội” bơh cau bơceh Văn Cao dê geh jơnau cih :“Gĭt nđờ mpồl ling lòt bè nsừc dà lềng dờng, gĭt nđờ mpồl ling  rê tus”. Jơnau đơs hơ̆ di mờ tŭ tơngai hơ̆. Tơl nă cau đơs jơnau đơs crih hơ̆ mờ chờ hờp uă ngan, khi sơñio gùng dong ai bol añ in mut”.