VOV4.K’ho- Tàm tơngume broă lơh tìp mat càr Gia Lai mờ lơgar Nhờk nam 2022, pa do, Sở Ngoại vụ càr Gia Lai pơgồp bal mờ Anih tờm broă drơng ala lơh broă mờ lơgar ndai mờ Pơrjum dunia – FSC (Sở Ngoại vụ ƀòn dờng Hồ Chí Minh) mờ Anih tờm tìp mat lơh quèng Việt Nhờk bơyai lơh pơrjum “Bơta pràn mờ tŭ niam bơcri priă đah càr Gia Lai mờ ală càr, ƀòn dờng bơh lơgar Nhờk dê”. Pơrjum gơ hòi gơ jà git nđờ rhiang mpồl lơh sa kă bro tàm càr mờ mpồl lơh sa kă bro tus bơh lơgar Nhờk tus bal mờ jòi git ală tŭ niam bơcri priă, lơh bal kă bro.

Gia Lai tŭ do geh rlau 800 rbô lồ ù bazan bal mờ trồ tiah niam, gơtùi tam chi tam kông nghiệp jŏ nam, ròng phan ròng dờng, tam brê. Tŭ do, càr geh rlau 500 rbô lồ chi tam tờm ngan geh kơphe, kau su mờ tiêu, mờ khà lơh geh pah nam git nđờ rbô tấn tơl bơta. Bal mờ hơ̆, Gia Lai kung neh bơt bơtaù phan bơna pal geh bơtàu tơnguh lơh sa mờ măi mok bè 3 tiah mờ 21 mpồl lơh sa mờ măi mok mờ kờp jơh bă ù ơnàng mờr 1 rbô lồ; bal mờ hơ̆ là phan bơna gùng lòt geh 1 ƀlàng rơndeh par mờ 3 gùng dờng, git nđờ jơt gùng càr, dong broă kă bro mờ ală tiah ndai tàm lơgar mờ ală lơgar Lào, Campuchia ƀuơn ƀuài. Tàm càr geh khà ƀưk xạ duh mờ càl gùt nam, di ngan nàng bơtàu tơnguh đèng năng lượng lơh geh wơl. Bơdìh hơ̆ tai, càr kung geh uă bơta pràn bơtàu tơnguh nhơl chờ. Tài tiah do geh niam chài cing mồng Tây Nguyên geh dờp là phan lời wơl niam chài ờ di phan bơna bơh kòn bơnus dunia dê, tiah sền gàr tiah kis dunia kơh bơnơm Kon Hà Nừng, ală tiah tềl kah yau dà lơgar kuơmàng Tây Sơn Thượng Đạo, tiah kơlôi sơnơng phan kah yau Rộc Tưng- Gò Đá mờ uă anih lòt sền niam ngan.

Gùt anih pơrjum

Tàm pơrjum, ală cau bơcri priă tus bơh lơgar Nhờk neh tơlik jơnau lùp tus kwang ala mat bơh Ủy ƀan Ñân zân càr Gia Lai, ală gah kế hoạc đầu tư, kông thương, lơh sa suơn sre mờ niam chài, tàp pràn să jan mờ nhơl chờ dê nàng lơh loh ală jơnau lùp bè broă bơcri priă, broă sền gàr tiah ơm kis mờ bè broă ngui ală broă dong kờl bè dia, sră nggal gơ wèt tus mờ cau bơcri priă lơgar ndai. Ồng Shimizu Akira, kwang atbồ Cơldŭ lơh broă anih lơh broă bal dunia lơgar Nhờk (JICA) ai tơnggŏ bơta kơp kờñ, Gia Lai pơn jat tai lơh niam 2, 3 broă nàng ală mpồl lơh sa kă bro lơgar Nhờk in iang nùs bơcri priă jŏ jòng: “Càr pal lơh gơlik bơta niam nàng dong broă bơcri priă geh lam lơh dùl bă kơ̆ kơljap. Mùl màl bè, càr pal lam lơh broă dong kờl nàng mpồl lơh sa kă bro bơcri priă tàm tơrbŏ bal niam mờ cau lơh broă, halà hìu măi pal geh ai lài năng lượng nàng gàr tơl đèng ai broă lơh sa in. Ală broă lơh ngan bè hơ̆ ngan geh dong cau bơcri priă iang nùs bơcri priă kă bro, lơh sa tàm càr”.

Tàm pơrjum, ồng Hồ Phước Thành, Phó Củ tịc Ủy ƀan Ñân zân càr Gia Lai pà git, broă chồl pràn gơ hòi gơ jà ală bơnah priă jền bơcri bơtàu tơnguh lơh sa suơn sre, lơh sa mờ măi mok lơh gơlik phan, lơh sa mờ măi mok lơh geh wơl mờ nhơl chờ geh càr đal git là dùl tàm ală kơnòl broă tờm tàm tơngai lơh broă bơh nam 2020 tus nam 2025. Gia Lai kơp kờñ, hòi jà mpồl lơh sa kă bro lơgar ndai, tàm hơ̆ geh mpồl lơh sa kă bro tus bơh lơgar Nhờk bơcri priă tàm ală gah. Bơta do ờ mìng dong mpồl lơh sa kă bro ngui, lơh gơlik bơta kuơ gơguh uă bơh ală bơta pràn mùl geh tàm càr; mờ kung dong kờl càr bơsram, jàu ală mờng chài atbồ, bơta chài măi mok kông nghệ kao. Càr Gia Lai hơ pơrgon sùm lòt bal, dong kờl mpồl lơh sa kă bro: “Bol hi geh bơta pin dờn lòt bal mờ mpồl lơh sa kă bro mờ sùm lơh gơlik bơta niam, dong kờl, tă bơsong kal ke ai mpồl lơh sa kă bro in. Bal mờ hơ̆ bol hi kung lơh niam broă bơcri priă, lơh bè lơi nàng mpồl lơh sa kă bro in ƀuơn ngan rlau jơh, niam ngan rlau jơh. Bơh dơ̆ pơrjum do, bol hi chờ hờp ngan, geh uă mpồl lơh sa kă bro lơgar nhờk, geh tŭ tàm lơgar Nhờk kung lam lơh pờ tơlik tơn tàm internet nàng jòi git. Bol he mìng rơp ai tơlikbroă lơh, ai lam lơh den ală mpồl lơh sa kă bro geh jòi git mờ ală kông ty, tập đoàn”.

Sở Ngoại vụ càr Gia Lai, Anih tờm broă drơng ala lơh broă mờ lơgar ndai mờ pơrjum dunia (FSC) mờ anih tờm tìp mat lơh quèng Nhờk- Việt neh kĭ lơh broă bal jŏ jòng

Nàng ai tơlik lài broă rơndap lơh lam lơh geh cồng nha pơrjum, ồng Hồ Phước Thành, Phó Củ tịc Ủy ƀan Ñân zân càr Gia Lai pà git, Nhờk ờ di là dùl drà kă bro ƀuơn, ală mpồl lơh sa kă bro càr Gia Lai ờ gơtùi geh mơ ală sră dan blơi phan uă mờ pal lơh hời rơ hời, nền nòn, tàm hơ̆ bơta lài ngan là pal tam gơl pa, ngui khoa họk kông nghệ tàm broă lơh sa, ngai sơlơ tơnguh bơta niam phan lơh gơs.

Di dơ̆ do, Sở Ngoại vụ càr Gia Lai, Anih tờm broă drơng ala lơh broă mờ lơgar ndai mờ pơrjum dunia (FSC) mờ anih tờm tìp mat lơh quèng Nhờk Việt neh kĭ lơh broă bal jŏ jòng; mờ 8 mpồl lơh sa kă bro tàm Gia Lai mờ Nhờk neh kĭ sră cih kah lơh broă bal tàm broă tac phan lơh gơs bơh suơn sre mờ tàm jàu măi mok lơh gơlik phan.

Cau mblàng K’Duẩn