Tus bal pơrjum do geh ồng Trần Hồng Hà, Phó Thủ tướng Cíñ phủ, bal mờ kwang bàng đơng lam bồ ală ƀộ, ngàñ dà lơgar. Đơs sồr lơh tàm pơrjum, ồng Trần Hồng Hà, Phó Thủ tướng Cíñ phủ đơs nền, tiah đah jum mat tơngai lik dà lơgar là tiah tờm bơtàu tơnguh, là tiah lam lài dờng ngan rlau jơh bè jơh ală bơta, cồng nha do geh bơta tă pơgồp uă ngan bơh ală anih bơto bơtê dê. Phó Thủ tướng Cíñ phủ sồr Ƀộ Giáo zụk mờ Đào tạo pơgồp bal mờ ală ƀộ, ngàñ, ală tiah kơlôi sơnơng bal bè bơtàu tơnguh bơto bơtê jăt jơnau cih tàm Kơrnoăt 24 bơh Ƀộ Cíñ trị dê. Bơh hơ̆, rơndăp ù tiah loh làng bè bơtàu tơnguh ală anih bơto bơtê, dipal mờ bơta mùl gŏ is bơh tơl càr tàm tiah đah jum mat tơngai lik dà lơgar dê; kờñ pal bơ̆t bơtàu tàm do bàr pe anih tờm bơto bơtê đại họk, rlau mờ đại họk, bơcri priă tàm ală gah broă pa, bơ̆t bơtàu ală anih tờm tam gơl bơceh lơh.