VOV4.K’ho- Gơ rềng tus rơndap broă lơh Bơtơt rbòng dà Krông Pách Thượng 4 rbô 400 tơmàn đông lơyài tơngai lam lơh, ngai 21/3, mpồl kwang bàng bơh Ƀộ Nông nghiệp mờ Phát triển Nông thôn dê lòt sền mờ sồr mhar lơh gơs broă lơh rơndap wơl ƀòn ơm kis pa tài rơngòt bơta ngơr bam gơlik geh wơl bè ală nam lài. Mpồl kwang bàng neh lòt sền tàm mpồl sơn rờp broă lơh bơtơt rbòng dà Krông Pách Thượng, ală bơtơt rbòng dà tờm, rbòng dà sơnĕ mờ 2 ƀòn ơm kis pa sồ 1 mờ sồ 2 bơh rơndap broă lơh dê.

Jat jơnau yal bơh Mpồl atbồ rơndap broă lơh bơtơt rbòng dà sồ 8 dê, tus tŭ do, broă lơh neh lam lơh geh mờr 80% khà broă, mờ bơtơt dơng dà tờm mờr lơh sir mờ neh lơh gơs rlau 40 kơi sồ tàm khà 60 kơi sồ rbòng lam dà. Gơ wèt mờ broă lơh rơndap ƀòn ơm kis pa, tiah lơh sa pa, Ƀộ Nông nghiệp mờ Phát triển Nông thôn sồr tàm nhai 6 tus do, Dăk Lăk pal ntrờn jơh ală làng bol lik bơh tiah ngơr bam tơnau dơng dà bơtơt rbòng dà Krông Pách Thượng.

Cau mblàng K’Duẩn