Drim òr (24/08), tàm Hìu pơrjum ƀòn dờng Hải Phòng (sồ hìu 18 gùng Hoàng Diệu, quận Hồng Bàng, ƀòn dờng Hải Phòng), Mpồl Đơng lam Đảng Dà lơgar, Quốk hội, Củ tịc lơgar, Cíñ phủ, Ủy ƀan Mặt trận Dà lơgar Việt Nam mờ cau hìu nhă neh bơyai lơh Dơ̆ còp  ƀồc ồng Lê Văn Thành, Kwang geh jơng tàm Đảng Dà lơgar, Phó Thủ tướng Cíñ phủ jăt broă lơh tơ̆p ƀồc kấp Dà lơgar. Ƀồc Phó Thủ tướng ồng Lê Văn Thành geh tơ̆ mờ ƀồng bi Dà lơgar ơn tàm anih niam bơnĕ ngan tàm Hìu Pơrjum ƀòn dờng Hải Phòng.

Lài ngan bơh dơ̆ còp ies, Mpồl kwang bàng ala măt Mpồl Đơng lam Đảng Dà lơgar mŭt còp mờ tam pà jơnau moăt bal mờ cau tàm hìu nhă ƀồc Phó Thủ tướng ồng Lê Văn Thành dê. Pơn jăt mờ hơ̆ là Mpồl Củ tịc lơgar, Mpồl Cíñ phủ, Mpồl Quốk hội, Mpồl Ủy ƀan Mặt trận dà lơgar Việt Nam mŭt còp ƀồc ồng Lê Văn Thành. Tus còp ƀồc Phó Thủ tướng gam geh ală kwang bàng đơng lam lài do Đảng, Dà lơgar, mpồl ala măt kwang bàng ală ƀộ, gah lơh broă dà lơgar, mpồl ala măt mpồl lơh broă dà lơgar mờ ală càr, ƀòn dờng; ală mpồl lơh broă bal mờ lơgar ndai, cau bơyô bơh dunia. Dơ̆ ies ƀồc Phó Thủ tướng ồng Lê Văn Thành geh bơyai lơh tàm 7 jơ ngai 26 nhai 8; Dơ̆ cèng mờ tơ̆p ƀồc Phó Thủ tướng geh bơyai lơh tàm ngai bal tàm Ƀlàng tơ̆p ƀồc ƀòn lơgar tờm tàm xã Tân Liên, kơnhoàl Vĩnh Bảo, ƀòn dờng Hải Phòng.