Di tàm tŭ 01 jơ mho, dơ̆ kah kơlôi Tổng Ƀí thư ồng Nguyễn Phú Trọng geh lơh tàm Hìu ies tơ̆p ƀồc Dà lơgar hìu sồ 05 gùng Trần Thánh Tông, ƀòn dờng Hà Nội. Tơnơ̆ mờ jơnau đơs crih dà lơgar geh bơyai lơh niam, Củ tịc lơgar ồng Tô Lâm ala măt kwang đơng lam Đảng, Dà lơgar sền jơnau kah kơlôi Tổng Ƀí thư ồng Nguyễn Phú Trọng.

Củ tịc lơgar ồng Tô Lâm yal wơl rài lơh broă bal mờ broă lơh kăc màng bơh Tổng Ƀí thư ồng Nguyễn Phú Trọng dê, ai tơngŏ mờr 60 nam lơh broă kăc màng uă bơta, lơh sùm, Giáo sư, Tiến sĩ, Tổng Ƀí thư ồng Nguyễn Phú Trọng mờ bơta ngăc ngar, jăk chài neh lời wơl ai gùt Đảng, gùt làng bol, gùt ling klàng he in bồ tơngoh bal mờ jơnau đơs geh kwơ màng ngan bè gùng dà broă lơh kăc màng lơgar Việt Nam dê tàm tơngai pa. Lài kung bè tơnơ̆, ngui jơnau bơceh lơh củ nghĩa Mác – Lê nin, nùs nhơm Hồ Chí Minh, mờ jơnau kờñ krơi is jơi bơtiàn mờ nùs nhơm mpồl bơtiàn, cau bồ tơngoh jăk Nguyễn Phú Trọng, cau lam lài jơnau đơs Đảng dê neh lơh àng gơcrà jơnau đơs bè củ nghĩa xã hội mờ gùng dà guh jăt củ nghĩa xã hội tàm lơgar Việt Nam dê, bè gơnoar bơh Đảng Kộng sản, bè lơh sa kă bro jăt gùng dà xã hội củ nghĩa…

Jơnau lời wơl kwơ màng hơ̆ neh tơnguh nùs nhơm pin dờn pràn ngan bè gùng dà guh jăt củ nghĩa xã hội, pơgăp bal kwơ màng ai broă bơtàu tơnguh bơh srơh kộng sản tàm dunia, bơtàu tơnguh củ nghĩa Mác – Lênin, nùs nhơm Hồ Chí Minh tàm tơngai tŭ do. Củ tịc lơgar đơs nền: “Ngăc Tổng Ƀí thư, gùt Đảng, gùt làng bol, gùt ling klàng dùl nùs lơh jăt jơnau kơ̆p kờñ bơh Tổng Ƀí thư dê, jơh nùs, jơh pràn drơng Dà lơgar, drơng làng bol, lơh geh cồng nha jơnau kờñ bơ̆t bơtàu dà lơgar Việt Nam ring lơngai, krơi is, tơrgùm bal, lơh tờm, pas gơs, pràn kơl dang, gơguh jăk, gơboh gơbài”.

Di 1 jiơ nggùl, dơ̆ lòt tơ̆p ƀồc geh bơyai lơh. Củ tịc lơgar ồng Tô Lâm, Thủ tướng Cíñ phủ ồng Phạm Minh Chính, Củ tịc Quôk hội ồng Trần Thanh Mẫn, Duh broă sùm Ƀan Ƀí thư ồng Lương Cường bal mờ uă kwang đơng lam bồ, lài do là Kwang đơng lam bồ Đảng, Dà lơgar, Kwang đơng lam bồ ală lơgar neh sền dờng màng lòt kềng ƀồc Tổng Ƀí thư ồng Nguyễn Phú Trọng, tơngăc ồng rê tàm tiah ơm rlô dŭt ndơl tàm Ƀlàng tơ̆p ƀồc Mai Dịch, Hà Nội.

Di 03 jiơ mho, ngai 26/07, dơ̆ tơ̆p ƀồc Tổng Ƀí thư ồng Nguyễn Phú Trọng geh bơyai lơh yŭ rơyùm tàm Ƀlàng tơ̆p ƀồc Mai Dịch, Hà Nội. Tàm bơta kah sơnđàc pơlai soh uă ngan, ala mat Mpồl rơndăp broă Dà lơgar ies tơ̆p ƀồc mờ hìu bơnhă Tổng Ƀí thư ồng Nguyễn Phú Trọng dê, ồng Lương Cường, Kwang bàng Ƀộ Cíñ trị, Duh broă sùm Ƀan Ƀí thư, Kwang atbồ Mpồl rơndăp broă Dà lơgar ies tơ̆p ƀồc neh đơs ưn ngài tus ală kwang bàng mờ làng bol: “Ala mat Mpồl rơndăp broă ies tơ̆p ƀồc mờ hìu bơnhă ồng Nguyễn Phú Trọng dê, añ jơh nùs ngan ưn ngài ală kwang đơng lam bồ, lài do là kwang đơng lam bồ Đảng, Dà lơgar, Mặt trận Dà lơgar Việt Nam; ală cau năc ala mat dờng màng mờ làng bol, kwang bàng gùt lơgar, ală mpồl ling phàu crong, ală cau gĭt wă jrô broă lơh, cau geh bồ tơngoh gĭt wă, gah kơđơng jat Yàng, ală mpồl kwang bàng Cribơyai broă mờ lơgar ndai, ala mat ală mpồl ală lơgar neh tus ies ƀồc, pơyoa guàng bơkào, điện tàm pà bal muat jrùm, tus bal dơ̆ pơrjum kah pơlai, dơ̆ tơ̆p ƀồc mờ tơngăc ồng Nguyễn Phú Trọng, Tổng Ƀí thư Mpồl duh broă Đảng Kộng sản dà lơgar Việt Nam tus tiah ơm rlô dŭt ndơl.